فوتو: قۋىرشاق تەاترىنىڭ ءباسپاسوز قىزمەتى
سونىمەن قاتار الداعى جىلدارى سەمەي, قوناەۆ جانە اقتوبە قالالارىندا جاڭا دراما تەاترلار بوي كوتەرەدى.
بۇگىنگى تاڭدا الماتى قالاسىنداعى مۇحتار اۋەزوۆ اتىنداعى قازاق ۇلتتىق دراما تەاترى مەن ناتاليا ساتس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىندا جوندەۋ جۇمىستارى ءجۇرىپ جاتىر.
سالالىق مينيسترلىك مادەني نىسانداردىڭ ينفراقۇرىلىمىن جاڭارتۋ ماسەلەسىنە دەن قويىپ وتىر. بيىل كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ باس كورپۋسى قايتا جاڭاردى. تەمىربەك جۇرگەنوۆ اتىنداعى ونەر اكادەمياسىنا ارنالعان جاڭا جاتاقحانا قۇرىلىسى باستالدى. بۇدان بولەك, ءىرى قالالاردا ءۇش جاڭا ونەر مەكتەبىنىڭ ينفراقۇرىلىمىن جاڭارتۋ ماسەلەسى پىسىقتالىپ جاتىر.
بيىل بارلىعى 61 مادەني نىسان سالىنعان. وڭىرلەردە 251 نىسانعا جوندەۋ جۇمىستارى جۇرگىزىلىپ جاتىر. سونداي-اق ەلوردا تاريحىن زەرتتەۋدىڭ ماڭىزدى ورتالىعىنا اينالاتىن «بوزوق» ارحەولوگيالىق پاركىن قۇرۋ جۇمىستارى قارقىن العان.
مينيسترلىك مادەنيەت قىزمەتكەرلەرىنە الەۋمەتتىك قولداۋ كورسەتۋگە ەرەكشە ءمان بەرەدى. ازاماتتىق قىزمەتكەرلەردىڭ كەي ساناتتارى بويىنشا جالاقىنى كەزەڭ-كەزەڭىمەن كوبەيتۋ كوزدەلگەن. 2022 جىلدان 2025 جىلعا دەيىن مادەنيەت جانە ارحيۆ ۇيىمدارىندا جۇمىس ىستەيتىن 64 مىڭ قىزمەتكەردىڭ جالاقىسى جىل سايىن 20%-عا ارتتى. مەملەكەت ونەر سالاسىندا قىزمەت ەتەتىن مامانداردى ستيپەنديالار مەن ماراپاتتار ارقىلى قولداۋدى جالعاستىرادى. جىل باسىندا 75 مادەنيەت قىزمەتكەرى مەملەكەتتىك ستيپەندياعا يە بولدى. پرەزيدەنت جارلىعىنا سايكەس بىرقاتار ازامات قازاقستان مادەنيەتىن دامىتۋ مەن ناسيحاتتاۋعا قوسقان ۇلەسى ءۇشىن ماراپاتتالدى.
سولاردىڭ قاتارىندا ەلىمىزدى الەمگە تانىتىپ جۇرگەن وپەرا ءانشىسى ماريا مۋدرياك بار. 2025 جىلى مەملەكەت باسشىسىنىڭ جارلىعىمەن وعان «قازاقستاننىڭ ەڭبەك سىڭىرگەن قايراتكەرى» اتاعى بەرىلدى.
«مەن ءۇشىن قازاقستاننىڭ ماراپاتقا لايىق ساناعانى – ۇلكەن قۇرمەت. پرەزيدەنتىمىزگە العىس بىلدىرەمىن. بيىل شىعارماشىلىعىما 28 جىل تولدى. مەن قازاقستاندى الەمنىڭ ەڭ ءىرى وپەرا ساحنالارىندا زور ماقتانىشپەن تانىستىرىپ, الداعى ۋاقىتتا دا ەل يگىلىگى ءۇشىن ايانباي قىزمەت ەتەمىن», دەدى ءانشى.
وسى وزگەرىستەردەن بولەك بىرقاتار جەتەكشى مادەنيەت مەكەمەلەرىنە «اكادەميالىق» مارتەبە بەرىلدى. اتاپ ايتساق, تالدىقورعان قالاسىنداعى ب. ريموۆا اتىنداعى دراما تەاترى, الماتى مەملەكەتتىك قۋىرشاق تەاترى, جامبىل وبلىستىق ا.توقپانوۆ اتىنداعى قازاق دراما تەاترى, باتىس قازاقستان وبلىستىق ع.قۇرمانعاليەۆ اتىنداعى فيلارمونياسىنىڭ مارتەبەسى وزگەردى.
