فوتو: ۇلتتىق ۇلان
اسكەرگە شاقىرۋ كەزىندە ساربازداردىڭ ەگىز ەكەنى انىقتالسا, اسكەري ءبولىم قولباسشىلىعى ولاردى ءبىر-بىرىنەن اجىراتپاي, قاتار قىزمەت ەتۋىنە جاعداي جاسايدى. بۇل شەشىم تەك تۇرمىستىق قولايلىلىق ەمەس, اسكەري ورتاداعى پسيحولوگيالىق تۇراقتىلىق پەن ءوزارا قولداۋدى نىعايتۋدىڭ ءتيىمدى ۇلگىسى.
ۇلتتىق ۇلان قاتارىنا بىلتىر الماتى وبلىسىنان شاقىرتىلعان 22 جاستاعى دياس پەن ءىلياس تولەپبەرگەندەر بۇگىندە وتان الدىنداعى بورىشىن ابىرويمەن وتەپ ءجۇر. دياس «سارباز 2.0» باعدارلاماسى اياسىندا جوعارى وقۋ ورنىندا تەگىن ءبىلىم الۋ مۇمكىندىگىنە يە بولىپ, اسكەري قىزمەت پەن بولاشاق كاسىبي دامۋ جولىن ۇشتاستىرا ءبىلدى.
ال 19 جاستاعى ەلحان مەن ەلشان نۋريەۆتەر ءۇشىن اسكەري قىزمەت سپورتتاعى جەتىستىكتەرىن جاڭا دەڭگەيگە كوتەرۋدىڭ مۇمكىندىگىنە اينالدى. ولار اسكەرگە دەيىن دە, اسكەر قاتارىندا دا ارمرەستلينگ سپورت تۇرىنەن ۇزدىكتەر قاتارىنان كورىنىپ كەلەدى.
تۇركىستان وبلىسىنان شاقىرتىلعان 19 جاستاعى نۇرسۇلتان مەن ەرسۇلتان بەركىشوۆتەر ەگىز بولعانىمەن, سىرتقى كەلبەتى مەن مىنەز-قۇلقى ءبىر-بىرىنە قاتتى ۇقسامايتىن ەرەكشە جۇپ. الايدا قىزمەتكە دەگەن جاۋاپكەرشىلىك پەن تارتىپكە ادالدىق ولاردى ءبىر ماقساتتا توعىستىرادى.
شىمكەنتتىك امان مەن ەسەن قونارلەر – كوپبالالى وتباسىنىڭ ۇلكەندەرى. ولاردىڭ ارتىنان ەرگەن ەكى ۇل مەن ءتورت قىز بار. بۇگىندە ەگىز ساربازدار №58 تۇزەۋ مەكەمەسىندە قاراۋىلدىق قىزمەت اتقارىپ, وتباسىنا ۇلگى بولۋمەن قاتار, ەل قاۋىپسىزدىگىن قامتاماسىز ەتۋگە ءوز ۇلەستەرىن قوسىپ ءجۇر.
ۇلتتىق ۇلان ساپىندا ءبىر مەزەتتە بىرنەشە ەگىز جۇپتىڭ قىزمەت ەتۋى – اسكەري قۇرىلىمداعى ادامگەرشىلىك, باۋىرمالدىق پەن اسكەري ءتارتىپتىڭ ۇيلەسىمدى كورىنىسى. مۇنداي سيرەك جايتتار اسكەري قىزمەتتىڭ تەك قاتاڭ تالاپتارعا ەمەس, رۋحاني تۇتاستىققا دا نەگىزدەلەتىنىن ايقىن دالەلدەيدى.
