فوتو: istockphoto.com
كۇن استرونومياسى زەرتحاناسىنىڭ مالىمەتىنشە, كۇن ديسكىسىنىڭ ورتالىق بولىگىندە وتە كۇردەلى ءپىشىندى كورونالدى ساڭىلاۋ پايدا بولعان. بۇل قۇرىلىم كۇننىڭ وڭتۇستىك جانە سولتۇستىك جارتى شارلارىن تۇگەل قامتىپ جاتىر. قازىرگى ۋاقىتتا كۇننەن ەسكەن جويقىن جەلدىڭ جىلدامدىعى سەكۋندىنا 700 شاقىرىمعا جەتتى, بۇل قالىپتى كورسەتكىشتەن ەكى ەسە جوعارى.
عالىمداردىڭ ايتۋىنشا, ماگنيت داۋىلىنىڭ العاشقى بەلگىلەرى بولجامنان ءبىر تاۋلىك بۇرىن بايقالا باستاعان. ءتۇن ورتاسىندا G1 دەڭگەيىندەگى العاشقى گەوماگنيتتىك اۋىتقۋلار تىركەلدى. ماماندار الداعى كۇندەرى جاعدايدىڭ ودان ءارى كۇردەلەنۋى مۇمكىن ەكەنىن ەسكەرتەدى. ەگەر جەرگە كەلەتىن پلازما اعىنى تىعىز ءارى بىرتەكتى بولسا, داۋىل كۇشى G2 دەڭگەيىنە دەيىن كوتەرىلۋى ىقتيمال.
ساڭىلاۋدىڭ كونفيگۋراتسياسى وتە كۇردەلى بولعاندىقتان, بولجام تۇراقسىز بولىپ وتىر. كۇن جەلىنىڭ مۇنداي جوعارى قىسىمى جەردىڭ قورعانىس قاباتىن – ماگنيتوسفەرانى وتە سەزىمتال ەتەدى. وسى شاعىن وزگەرىستەردىڭ ءوزى قايتالاما ماگنيت داۋىلدارىن تۋدىرۋىنا اكەپ سوعۋى مۇمكىن.
استرونومدار مۇنداي جوعارى جىلدامدىقتاعى كۇن جەلىنىڭ اسەرى كەم دەگەندە تاعى 2-3 تاۋلىككە سوزىلاتىنىن حابارلادى. بۇل كەزەڭدە بايلانىس جۇيەلەرىندە اقاۋلار بولۋى مۇمكىن جانە مەتەوسەزىمتال ادامداردىڭ دەنساۋلىعىنا باسا نازار اۋدارعانى ءجون.
