جوبا اۆسترالياداعى Minderoo Foundation قايىرىمدىلىق قورى ازىرلەگەن Thrive by Five باعدارلاماسى نەگىزىندە, قر وقۋ-اعارتۋ مينيسترلىگىنىڭ, بالالاردىڭ ەرتە دامۋى ينستيتۋتىنىڭ, سونداي-اق ءبىلىم بەرۋ ساياساتى سالاسىنداعى ساراپشىلاردىڭ قاتىسۋىمەن جۇزەگە اسىرىلدى. جوبانىڭ ۇيلەستىرۋشىسى – احمەت بايتۇرسىن ۇلى اتىنداعى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى.
«بەسكە دەيىن ۇلگەر» (Thrive by Five Kazakhstan) جوباسىنىڭ جەتەكشىسى ەرلان ۋتەۋليننىڭ ايتۋىنشا, بۇل رەسۋرستىڭ بىرەگەيلىگى – ەرتە جاستاعى بالالاردىڭ دامۋىنا ارنالعان عىلىمي نەگىزدەلگەن تاجىريبەلەر پلاتفورماسىنىڭ قازاقستاننىڭ مادەني جانە ۇلتتىق قۇندىلىقتارىن تولىق ەسكەرە وتىرىپ بەيىمدەلۋىندە.
«جوبا اياسىندا پلاتفورما ازىرلەندى. وندا 10 باعىت بويىنشا 120-دان استام پراكتيكالىق كەڭەس پەن ءىس-ارەكەت قامتىلعان. قولايلىلىق ءۇشىن ماتەريالدار بالالاردىڭ جاس ەرەكشەلىكتەرىنە قاراي توپتاستىرىلعان. بارلىق ماتەريالدار قازاق, ورىس جانە اعىلشىن تىلدەرىندە قولجەتىمدى», دەپ اتاپ ءوتتى ەرلان ۋتەۋلين.
زەرتتەۋ ەلدىڭ 6 ءوڭىرىن قامتىپ, 1200-دەن استام اتا-انانى جانە مەكتەپكە دەيىنگى ۇيىمداردىڭ پەداگوگتەرىن قامتىدى. زەرتتەۋ ناتيجەلەرىنە سايكەس, اتا-انالاردىڭ 76%-دان استامى رەسۋرستى پايدالانۋعا قاناعاتتانعانىن اتاپ وتسە, قاتىسۋشىلاردىڭ 80%-دان استامى بۇل رەسۋرس بالا دامۋى مەن قارىم-قاتىناسىندا جاڭا تاسىلدەردى مەڭگەرۋگە جانە قولدانۋعا كومەكتەسكەنىن حابارلاعان.
ەڭ ايقىن وڭ وزگەرىستەر قازاق تىلىندە سويلەيتىن وتباسىلاردا بايقالدى, بۇل رەتتە زەرتتەۋشىلەر ەرتە دامۋ بويىنشا ساپالى رەسۋرستاردىڭ قازاق تىلىندە قولجەتىمدىلىگىن ارتتىرۋدىڭ ماڭىزدىلىعىن اتاپ وتەدى.
مەكتەپكە دەيىنگى جاستاعى بالالاردىڭ اتا-انالارىن ادىستەمەلىك قولداۋدىڭ الەۋەتى «تالداۋ» ورتالىعى جۇرگىزگەن اتا-انالارعا ارنالعان كونسۋلتاتسيالىق پۋنكتتەردىڭ قىزمەتى تۋرالى زەرتتەۋدە دە كورسەتىلگەن.
زەرتتەۋ ناتيجەلەرى تسيفرلىق شەشىمدەردىڭ ەرتە جاستاعى بالالاردى دامىتۋ سالاسىنداعى مەملەكەتتىك ساياساتتى ءتيىمدى تولىقتىرا الاتىنىن, الەۋمەتتىك وسال توپتاردى قوسا العاندا, وتباسىلاردى كەڭىرەك قامتۋعا جانە بالالاردىڭ ەڭ ەرتە كەزەڭنەن باستاپ دامۋى ءۇشىن تەڭ مۇمكىندىكتەر قالىپتاستىرۋعا ىقپال ەتەتىنىن كورسەتەدى.
«بەسكە دەيىن ۇلگەر» جوباسىنىڭ تسيفرلىق پلاتفورماسى جانە ونىڭ پراكتيكالىق ساباقتارى تۋرالى تولىعىراق https://www.thrivebyfive.kz سايتىنان تانىسۋعا بولادى.
