ورتالىقتا ءبىر ۋاقىتتا 18 جاسقا دەيىنگى 125 بالاعا 8 باعىت بويىنشا جارتىلاي ستاتسيونارلىق جاعدايدا ساپالى الەۋمەتتىك قىزمەتتەر كورسەتىلەدى.
ىرگەلەس جاتقان 4 اۋدان, قالانىڭ 90-عا جۋىق تۇرعىنى تۇراقتى جۇمىسپەن قامتىلادى. جاڭا ورتالىق زاماناۋي قۇرالدارمەن جابدىقتالىپ, بالالار ءۇشىن بارلىق جاعداي جاسالعان.
ورتالىقتىڭ اشىلۋ راسىمىندە «سامۇرىق-قازىنا» اق-نىڭ باسقارۋشى ديرەكتورى عيبرات اۋعانوۆ جوبا بىرىڭعاي ستاندارتتار نەگىزىندە جۇزەگە اسىرىلىپ, تۇراقتى الەۋمەتتىك ناتيجەگە باعىتتالعانىن اتاپ ءوتتى. سونداي-اق سارىاعاش قالاسىندا جانە تۇرار رىسقۇلوۆ اۋىلىندا «Ainala» وڭالتۋ ورتالىقتارى ءوز جۇمىسىن باستايتىنىن, ال جىل سوڭىنا دەيىن قوردىڭ قولداۋىمەن اشىلعان وسىنداي ورتالىقتاردىڭ سانى 55-كە جەتەتىنىن ءمالىم ەتتى.
اتالعان ورتالىق تۇركىستان وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا تيەسىلى جانە جارتىلاي ستاتسيونارلىق ۇلگىسىندە جۇمىس ىستەيدى. بالالارعا تۇرمىستىق, الەۋمەتتىك-مەديتسينالىق, الەۋمەتتىك-پسيحولوگيالىق, پەداگوگيكالىق, الەۋمەتتىك-مادەني, الەۋمەتتىك-قۇقىقتىق جانە الەۋمەتتىك-ەكونوميكالىق قىزمەتتەر كورسەتىلەدى. زاماناۋي تالاپقا ساي ورتالىقتىڭ ماتەريالدىق-تەحنيكالىق بازاسىن نىعايتۋعا «قازاقستان حالقىنا» قوعامدىق قورىنىڭ سەرىكتەستەرى – «قامقورلىق» كورپوراتيۆتىك قورى مەن «Samruk-Kazyna Trust» كورپوراتيۆتىك قورى بىرلەسىپ, 350 ملن تەڭگە, ال قىزمەتكەرلەردى وقىتۋعا 40 ملن تەڭگە قاراجات ءبولدى. جاڭا ورتالىق وڭىردە اۋتيزم جانە باسقا دا مەنتالدى بۇزىلىستارى بار بالالاردىڭ مىنەز-قۇلقىن تۇزەتۋگە, ولاردىڭ قوعامعا بەيىمدەلۋىنە جانە تولىققاندى الەۋمەتتەنۋىنە وڭ ىقپال ەتەتىن ماڭىزدى الەۋمەتتىك نىسان بولماق.
ايتا كەتەيىك, بۇگىندە تۇركىستان وبلىسىندا مۇگەدەكتىگى بار ادامداردىڭ جالپى سانى 102 مىڭ بولسا, ونىڭ ىشىندە 15 457-ءى بالالار. ال 2025 جىلعى 1 جەلتوقسانداعى مالىمەتكە سايكەس وبلىس اۋماعىندا اۋتيستىك سپەكترىنىڭ بۇزىلۋى دياگنوزى قويىلعان 398 بالا تىركەلگەن.
