بۇرىنعى قازاقستاندىق عالىم اۆستراليادا ايەلىن ءولتىردى

استانا. 23 اقپان. اۆستراليادا تۇراتىن بۇرىنعى قازاقستاندىق, اۋىل شارۋاشىلىعى وسىمدىكتەرىنىڭ گەندى ينجەنەرياسى سالاسى بويىنشا مامان سەرىك ەلىبايعا ءوزى سەكىلدى عالىم ايەلى اينۇر يسماعۇلدى ءولتىردى دەگەن كۇدىك تاڭىلىپ وتىر. بۇل تۋرالى اۆستراليانىڭ Adelaide Now باسىلىمى حابارلادى. «اۋىل شارۋاشىلىعى داقىلدارىن گەنەتيكالىق جاعىنان زەرتەۋشى حالىقارالىق ساراپشى ءوزى سەكىلدى تاعى ءبىر عالىمدى, ءوزىنىڭ ايەلىن كلەمزيگتەگى ۇيىندە ءولتىردى دەگەن ايىپپەن سوت الدىنا باردى», - دەلىنگەن حابارلامادا. سونىمەن بىرگە, «53 جاستاعى سەرىك ەلىباي ورىس ءتىلدى اۋدارماشىمەن ادەلايدانىڭ بىتىمگەر سۋدياسى الدىنا بارعاندا, ءوزىن كەپىلدەمەمەن بوساتۋ جونىندە ءوتىنىش ايتقان جوق». «ول ءساۋىر ايىندا وتەتىن سوتقا دەيىن ەندى ق ۇلىپ استىندا بولادى», - دەپ اتاپ وتىلگەن جاريالانىمدا.

حابارلانعانداي, ەلىباي قىلمىس ورنىندا ۇستالعان. «كەشە, دۇيسەنبى كۇننىڭ كەشىندە (16 اقپان – قازتاگ) ساعات 10:45 شاماسىندا پوليتسيا كلەمزيگتەگى تيستل اۆەنيۋىنە شاقىرۋ بويىنشا جەتىپ, ەلىبايدىڭ ايەلى اينۇر يسماعۇلدىڭ جانسىز دەنەسىنىڭ ۇستىنەن ءتۇستى. ول قىلمىس ورنىندا تۇتقىندالىپ, بۇگىن (17 اقپان – قازتاگ) تاڭەرتەڭ وعان كىسى ولتىرگەنى جونىندە ايىپتاۋ ۇسىنىلدى», - دەلىنگەن حابارلامادا. سونداي-اق پوليتسيانىڭ ۇيدەن بىرنەشە قاعاز پاكەتپەن ايعاق بولاتىن زاتتاردى الىپ كەتكەنى ايتىلادى.

كورشىلەرىنىڭ ايتۋلارىنشا, ەلىباي مەن يسماعۇلدىڭ وتە تاتۋ-ءتاتتى جۇپ بولىپ ءومىر سۇرگەندەرىن, ەكەۋىنىڭ ۇل مەن قىز تاربيەلەپ وتىرعاندارىن, بۇعان دەيىن ۇيلەرىنەن ۇرىس-جانجال ەستىلمەگەنىن جەتكىزدى. 55 جاستاعى اينۇر يسماعۇل قازكسر مينيسترلەر كەڭەسى جانىنداعى قازتاگ اگەنتتىگىن كوپ جىل باسقارعان جۇماعالي يسماعۇلوۆتىڭ قىزى ەدى. ول كۇيەۋىمەن بىرگە 2006 جىلدان بەرى ەرربرو قالاسىنداعى اۆستراليا وسىمدىكتەردىڭ فۋنكتسيونالدى گەنوميكا ورتالىعىندا جۇمىس جاساپ كەلدى. سەرىك ەلىباي مەن اينۇر يسماعۇل عىلىمي ورتادا اۋىل شارۋاشىلىعى مەن گەنەتيكاسىنىڭ ماماندارى رەتىندە بەلگىلى بولاتىن. ولار اۆسترالياعا كەلىپ قونىستانعانعا دەيىن ۋكراينا, كانادا, گەرمانيا جانە ۆەنگريا سەكىلدى كوپتەگەن ەلدەردە تۇرىپ, جۇمىس ىستەگەن. مۇرات ايتقوجا. سۋرەتتەر: قازتاگ.