فوتو: polisia.kz
ىشكى ىستەر مينيسترلىگى مەن الماتى قالالىق پوليتسيا دەپارتامەنتىنىڭ ۇيلەسىمدى ءىس-قيمىلىنىڭ ارقاسىندا كاننابيس توبىنا جاتاتىن ەسىرتكى زاتتارىن تاسىمالداۋ, ساقتاۋ جانە ساتۋمەن اينالىسقان توپتىڭ قىزمەتى توقتاتىلدى.
جەدەل-ىزدەستىرۋ شارالارى بارىسىندا بىرنەشە كۇدىكتى قولعا ءتۇسىپ, ولاردان ءىرى كولەمدە ەسىرتكى زاتى مەن اقشالاي قاراجات تاركىلەندى. سونىمەن قاتار ەسىرتكى جاسىرۋ ءۇشىن پايدالانىلعان ارنايى ورىندار انىقتالدى.
سوت-ساراپتاما قورىتىندىسىنا سايكەس, تاركىلەنگەن گاشيشتىڭ جالپى سالماعى 16 كەلىدەن اسقان. بۇل زاڭناما بويىنشا «ەرەكشە ءىرى كولەم» بولىپ سانالادى.
الماتى قالالىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇماباەۆتىڭ ايتۋىنشا, بۇل وپەراتسيا وڭىرارالىق ەسىرتكى جەتكىزۋ ارناسىن جويۋعا باعىتتالعان.
«مۇنداي قىلمىستار قوعامدىق قاۋىپسىزدىككە ەلەۋلى قاتەر توندىرەدى. سوندىقتان پوليتسيا ءۇشىن تاسىمالداۋدان باستاپ ساتۋعا دەيىنگى بۇكىل تىزبەكتى انىقتاۋ جانە جويۋ باسىم مىندەت بولىپ قالا بەرەدى. ءبىز بۇل باعىتتاعى باقىلاۋدى كۇشەيتىپ, جۇمىستى جالعاستىرامىز», دەدى ول.
قازىرگى تاڭدا اتالعان دەرەك بويىنشا قىلمىستىق ءىس قوزعالدى. كۇدىكتىلەر ۋاقىتشا ۇستاۋ يزولياتورىنا قامالىپ, تەرگەۋ امالدارى جۇرگىزىلىپ جاتىر.
