فوتو:depositphotos.com
قاماۋعا الىنعانداردىڭ اراسىندا ەليسەي سارايىندا جۇمىس ىستەگەن كۇمىس شەبەرى دە بار. تەرگەۋ دەرەكتەرىنە سايكەس, ەر ادامنىڭ Vinted-تەگى اككاۋنتىندا «فرانتسيانىڭ اسكەري-اۋە كۇشتەرى» دەگەن جازۋى بار تارەلكەلەر مەن «سەۆر مانۋفاكتۋراسى» دەگەن بەلگىسى بار كۇلسالعىشتار ورنالاستىرىلعان. مۇنداي بۇيىمدار ادەتتە كوپشىلىككە قولجەتىمدى بولمايدى.
تەرگەۋشىلەردىڭ ايتۋىنشا, ونىڭ ۇيىنەن, كولىگىنەن جانە جەكە شكافىنان شامامەن 100-گە جۋىق زات تابىلعان. ولاردىڭ قاتارىندا سەۆر فارفورى, رەنە لاليكتىڭ مۇسىنشەسى, Baccarat شامپان بوكالدارى جانە مىس قازاندار بولعان.
كۇمىس ىدىستارعا جاۋاپتى قىزمەتكەردىڭ مىندەتىنە پرەزيدەنتتەر, كورول اۋلەتىنىڭ مۇشەلەرى جانە وزگە دە جوعارى لاۋازىمدى تۇلعالار پايدالاناتىن اسحانا جابدىقتارىن ساقتاۋ مەن كۇتىپ-باپتاۋ كىرەدى. پروكۋرورلاردىڭ مالىمەتىنشە, قاماۋعا الىنعان قىزمەتكەر جاساعان تۇگەندەۋ جازبالارى ونىڭ بولاشاقتا دا ۇرلىق جاساۋدى جوسپارلاعانىن مەڭزەيدى.
ۇرلانعان زاتتاردىڭ باسىم بولىگى 1759 جىلدان بەرى فرانتسيا مەملەكەتىنىڭ مەنشىگىندە تۇرعان, پاريجدەگى اتاقتى سەۆر مانۋفاكتۋراسىندا جاسالعان.
ەليسەي سارايىنىڭ قىزمەتكەرلەرىن تەرگەۋ سەۆر فابريكاسىنىڭ جۇمىسشىلارى جوعالعان كەيبىر بۇيىمداردى اۋكتسيون سايتتارىنان تانىپ بىلگەننەن كەيىن باستالعان.
The Guardian مالىمەتىنشە تابىلعان زاتتاردىڭ (جالپى قۇنى 40 مىڭ) بارلىعى ەليسەي سارايىنا قايتارىلدى. بۇعان دەيىن لۋۆر مۋزەيىندە زاتتار ۇرلانعان ەدى.
