1968 جىلى تۋعان ناۋقاس سوڭعى 5 جىل بويى ارتەريالىق گيپەرتەنزيامەن اۋىرعان. سوڭعى بىرنەشە جىلدا قان قىسىمى ۇنەمى 250/140 مم سىن.باع. جانە ودان دا جوعارى بولىپ, بۇل ومىرگە اسا قاۋىپتى جاعدايعا اكەلگەن.
مۇنداي جاعدايدا كەز كەلگەن ۋاقىتتا مي قان تامىرى جارىلىپ, ينسۋلت الۋ قاۋپى وتە جوعارى بولعان. 2024 جىلى ناۋقاستىڭ قۇرساق اورتاسىنا ستەنت-گرافت يمپلانتاتسيالانعان.
– اۋرۋحاناعا اۋىر حالدە تۇسكەن ناۋقاس تولىق تەكسەرۋدەن وتكىزىلدى. تەكسەرۋ ناتيجەسىندە سول جاق بۇيرەككە باراتىن ارتەريانىڭ 99% تارىلعانى انىقتالدى. اورتادا ستەنت-گرافت ورناتىلعاندىقتان, ءداستۇرلى شۋنتتاۋ وپەراتسياسىن جاساۋ مۇمكىن بولمادى. وسىعان بايلانىستى ناۋقاستىڭ سول بۇيرەگى الىنىپ, وڭ جاق مىقىن ارتەرياسىنا قايتا تىگىلىپ ورنالاستىرىلدى, – دەلىنگەن حابارلامادا.
وپەراتسيا قان تامىر حيرۋرگتارى مەن ترانسپلانتولوگتاردىڭ بىرلەسكەن جۇمىسىنىڭ ناتيجەسىندە ءساتتى ءوتتى.
قازىرگى تاڭدا ناۋقاستىڭ جاعدايى تۇراقتى, بولىمشەگە اۋىستىرىلدى. قان قىسىمى قالپىنا كەلدى.
بۇيرەك اۋتوترانسپلانتاتسياسى – بۇيرەكتى تولىق الىپ تاستاماي, اعزانى ساقتاپ قالۋعا مۇمكىندىك بەرەتىن جوعارى تەحنولوگيالىق جانە سيرەك جاسالاتىن وتا ءتۇرى. اتالعان وپەراتسيانىڭ شىمكەنت قالاسىندا العاش رەت جاسالۋى وڭىرلىك مەديتسينانىڭ جوعارى دەڭگەيگە كوتەرىلگەنىن كورسەتىپ, كۇردەلى دياگنوزى بار ناۋقاستاردى ءوز وڭىرىندە ەمدەۋگە ۇلكەن مۇمكىندىك اشىپ وتىر.
