«استانا» ەستونيا كومانداسىن جەڭدى

استانا. 23 اقپان. ۆتب ليگاسى اياسىندا «استانا» باسكەتبول كومانداسى ءوز الاڭىندا ەستونيالىق «كالەۆتى» 93:72 ەسەبىمەن جەڭدى. بۇل تۋرالى egemen.kz حابارلادى. ويىن تىزگىنىن بىردەن ءوز قولدارىنا العان الاڭ يەلەرى العاشقى كەزەڭدى 24:18 ەسەبىمەن ءوز پايدالارىنا اياقتادى. ايتسە دە, كەلەسى كەزەڭدە قوناقتار جيناقىلىق تانىتىپ, 25:17 ەسەبىمەن باسىم ءتۇستى. ناتيجەسىندە, ۇلكەن ۇزىلىسكە «كالەۆ» كومانداسى 2 ۇپاي باسىمدىعىمەن اتتاندى (43:41). ءۇشىنشى كەزەڭ تاعى دا قوناقتاردىڭ باسىمدىعىمەن باستالدى. دەگەنمەن, بۇل جولى دجەرري دجونسون مەن دجەيكوۆان براۋن باستاعان «استانا» ويىنشىلارى «كالەۆتىڭ» قارقىنىنا تويتارىس بەرە الدى. كەزەڭدى 25:21 ەسەبىمەن اياقتاعان استانالىقتار جالپى ەسەپتە دە العا شىقتى (66:64). ال شەشۋشى ءتورتىنشى كەزەڭدە رامۋناس بۋتاۋتاستان ءتالىم الاتىن «استانا» ويىنشىلارى قارسىلاستارىنىڭ ادىمىن اشتىرماردى. سوڭعى كەزەڭ 27:8 ەسەبىمەن ەلوردالىقتاردىڭ پايداسىنا اياقتالدى. بۇل رامۋناس مىرزا كەلگەلى «استانانىڭ» ۆتب ليگاسىنداعى العاشقى جەڭىسى. ءبىزدىڭ كوماندا وسىعان دەيىن جەتى ويىن قاتارىنان جەڭىلگەن ەدى. وسى جەڭىستەن كەيىن ەلوردالىق كوماندا تۋرنير كەستەسىندە ەكى ساتى جوعارى ورلەپ, 12-ورىنعا تابان تىرەدى. ليگا اياسىنداعى كەزەكتى ويىنىن «استانا» 1 ناۋرىز كۇنى سىرت الاڭدا ساراتوۆتىڭ «اۆتودورىنا» قارسى وتكىزەدى. ەلامان قوڭىر. دەرەك: egemen.kz. سۋرەت: bcastana.kz.