وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى عالىمجان وتەلباي ۇلى سالتاناتتى ءىس-شاراعا كەلىپ, قۇتتىقتاۋ ءسوزىن ايتتى.
– بۇل ءىس-شارا تەك ءبىر ادامنىڭ عۇمىرىن ۇلىقتاۋ ەمەس, سول تۇلعانىڭ قالامىنا ارقاۋ بولعان تۇتاس ءوڭىردىڭ تاريحىنا تاعزىم ەتۋ. وتكەندى ۇلىقتاپ, كەلەشەككە ىزگىلىكپەن قادام باسۋ – جاقسىلىقتىڭ نىشانى. سۇلتان كەمەلباەۆتىڭ ومىرلىك جولى – ماماندىعىنا ادالدىق پەن كاسىبيلىكتىڭ وزىق ۇلگىسى. ول جۋرناليستيكاداعى ەڭبەگىمەن, ەلگە دەگەن ماحابباتىمەن جاس ۇرپاقتىڭ جادىندا ساقتالماق, – دەدى عالىمجان وتەلباي ۇلى.
سوڭىنان وشپەس ءىز قالدىرعان قالامگەردىڭ جەكە مۇراعاتىنداعى قۇجاتتاردى وبلىستىق مەملەكەتتىك ارحيۆكە وتباسى تاپسىردى. جالپى 30-عا جۋىق قۇجات. قىزى ساۋلە كەمەلباەۆا بۇل قادامدى اكەلەرىنىڭ ەلگە ەتكەن ەڭبەگى ەل جادىندا ساقتالۋى ءۇشىن اسا ماڭىزدى دەپ وتىر.
– اكەمىزدىڭ جەكە قۇجاتتارىن تۇگەل تاپسىردىق. ءومىربايانى, شىعارماشىلىق جولى, اكىمشىلىك جۇمىستاعى قۇجاتتارى, بارلىعى دەرلىك ارحيۆكە تابىستالدى. اكەم ءوزىنىڭ سانالى عۇمىرىن, كۇش-قايراتىن وبلىستىڭ وركەندەۋىنە ارنادى. جۋرناليستيكا سالاسىندا تەر توكتى. ءوڭىردىڭ بارلىق جەتىستىگىن, ماسەلەلەرىن, كۇندەلىكتى ءومىرىن قالامىنا ارقاۋ ەتتى. ءوزى ۇزاق جىل قىزمەت اتقارعان وبلىستىق «يندۋستريالنايا كاراگاندا» گازەتى دە ماڭىزدى قۇجاتتارىن تابىس ەتتى. ماقالالار, وچەركتەر ەندى جاس ۇرپاقتىڭ يگىلىگىنە جارايدى دەپ ويلايمىز, – دەدى ساۋلە كەمەلباەۆا.
سۇلتان كەمەلباەۆ وبلىستىق «يندۋستريالنايا كاراگاندا» گازەتىندە 13 جىل باس رەداكتور قىزمەتىن ابىرويمەن اتقاردى. 1946 جىلى 6 قىركۇيەكتە بالقاش قالاسىندا تۋعان. ەڭبەك جولىن بالقاشتاعى كەن ورىندارىنىڭ بىرىندە ەلەكتريك بولىپ باستاعان. لەنينيگرادتاعى مەملەكەتتىك ۋنيۆەرسيتەتتىڭ جۋرناليستيكا كافەدراسىن تامامداعان تالاپتى جۋرناليست «يندۋستريالنايا كاراگاندا» گازەتىنە 1974 جىلى ءتىلشى بولىپ قىزمەتكە ورنالاسقان. الماتىدعى جوعارى پارتيالىق مەكتەپتىڭ دە تۇلەگى. «ترۋد», «رابوچايا تريبۋنا», «نا گورا» گازەتتەرىندە دە قىزمەت اتقارعان. «ۆەچەرنيايا كاراگاندا» گازەتىنىڭ باس رەداكتورى دا بولعان. 1993–2006 جىلدار ارالىعىندا «يندۋستريالنايا كاراگاندا» گازەتىنىڭ ۇجىمىن باسقاردى. 2006 جىلى «شاحتەرسكايا نەدەليا» گازەتىن دە تىزگىندەدى.
ارداگەر جۋرناليست, سۇلتان كەمەلباەۆتىڭ قالامگەر دوسى امان جانعوجين ارحيۆكە تاپسىرىلعان قۇجاتتار ستۋدەنتتەردىڭ ديپلومدىق جۇمىسىنا ارقاۋ بولاتىنىن ايتتى.
– سۇلتان كەمەلباەۆ – وتە ءبىلىمدى, بيىك تۇلعالى, ەڭبەكقور ازامات ەدى, كەز كەلگەن تاقىرىپتى جازاتىن ورەلى جۋرناليست ەدى. مۇنداي تۇلعانىڭ مۇرالارى كەلەشەكتە زەرتتەلۋگە ءتيىس. اسىرەسە بولاشاق جۋرناليستەر ونىڭ ەڭبەكتەرىن ديپلومدىق جۇمىستارىنا ارقاۋ ەتىپ, ۇلگى الۋى ماڭىزدى, – دەدى امان جانعوجين.
سۇلتان كەمەلباەۆتىڭ جەكە مۇراعات قۇجاتتارىنىڭ وبلىستىق ارحيۆكە تاپسىرىلۋى – تۇلعانىڭ جارقىن بەينەسىن قۇرمەتتەۋدىڭ عانا ەمەس, ءوڭىر تاريحىن بايىتا ءتۇسۋدىڭ ماڭىزدى قادامى. قالامگەردىڭ ءومىر جولى, جۋرناليستىك ەڭبەگى مەن قوعامدىق قىزمەتى بولاشاق ۇرپاققا ۇلگى بولارى ءسوزسىز. ارحيۆكە تاپسىرىلعان قۇجاتتار جاس زەرتتەۋشىلەر مەن جۋرناليستيكا سالاسىنىڭ ماماندارىنا تالىمدىك ماتەريال بولۋمەن قاتار, ءوڭىردىڭ رۋحاني قازىناسىن تولىقتىرا تۇسپەك. سۇلتان كەمەلباەۆتىڭ قالدىرعان مۇراسى – ونىڭ ەلگە دەگەن ادالدىعى مەن كاسىبي بيىگىنىڭ ماڭگىلىك دالەلى.
قاراعاندى وبلىسى
