ازاماتتىق اۆياتسيا كوميتەتىنىڭ مالىمەتىنشە, اۋە كەمەلەرىن مۇزدان تازارتۋ (دەايسينگ) – ۇشاقتى قاۋىپسىز ۇشىرۋ ءۇشىن جۇرگىزىلەتىن دايىندىقتىڭ اسا ماڭىزدى بولىگى.
– قىس مەزگىلىندە مۇزدانۋ قاۋپى ايتارلىقتاي ارتادى. قاناتتاردا نەمەسە باسقا دا ماڭىزدى بەتتەردە پايدا بولعان مۇزدىڭ, قىراۋدىڭ نەمەسە قاردىڭ جۇقا قاباتىنىڭ ءوزى اۋە كەمەسىنىڭ اەروديناميكالىق قاسيەتتەرىن ناشارلاتىپ, اۋا كەدەرگىسىن ارتتىرىپ, كوتەرۋ كۇشىن ازايتادى. بۇل ۇشۋ سيپاتتامالارىنىڭ تومەندەۋىنە الىپ كەلەدى, – دەلىنگەن حابارلامادا.
وسى سەبەپتى حالىقارالىق تاجىريبە مەن ۇلتتىق راسىمدەردە مىندەتتى تۇردە مۇزدان تازارتۋ قولدانىلادى. ول ادەتتە ءبىر نەمەسە ەكى كەزەڭدە جۇرگىزىلەتىن ارنايى سۇيىقتىقتى قولدانۋدى قامتيدى:
- اۋە كەمەسىنىڭ ماڭىزدى بەتتەرىنەن مۇزدى, قاردى, قىراۋدى جانە باسقا دا لاستانۋلاردى الىپ تاستاۋ;
- قايتا مۇزدانۋدىڭ الدىن الۋ ءۇشىن بەلگىلى ءبىر ۋاقىت ىشىندە اسەر ەتەتىن قورعانىس قاباتىن جاعۋ.
ازاماتتىق اۆياتسيا كوميتەتى مۇزدانۋعا قارسى وڭدەۋدىڭ نە سەبەپتى جولاۋشىلار ۇشاققا وتىرعاننان كەيىن باستالاتىنىن دا ءتۇسىندىردى.
– مۇزدان تازارتۋ جۇمىستارى جولاۋشىلار تولىق وتىرعىزىلىپ, اۋە كەمەسىنىڭ بارلىق ەسىكتەرى جابىلعاننان كەيىن جۇرگىزىلەدى. بۇل تالاپتىڭ نەگىزگى سەبەبى – مۇزدانۋعا قارسى سۇيىقتىقتاردىڭ اسەر ەتۋ ۋاقىتىنىڭ شەكتەۋلى بولۋىندا. قورعانىس قاباتىنىڭ تيىمدىلىگىن بارىنشا ارتتىرۋ جانە ونىڭ ۇشىپ شىققانعا دەيىن ساقتالۋىن قامتاماسىز ەتۋ ءۇشىن وڭدەۋ مۇمكىندىگىنشە ۇشۋ ۋاقىتىنا جاقىن جاسالۋى ءتيىس, – دەلىنگەن حابارلامادا.
جولاۋشىلار وتىرعىزىلىپ, ەسىكتەر جابىلعاننان كەيىن ۇشاق تۇراقتا قالادى نەمەسە ارنايى مۇزدان ارىلتۋ الاڭىنا جەتكىزىلەدى. اۋا رايى جاعدايىنا بايلانىستى وڭدەۋ بىردەن نەمەسە جاعداي جاقسارعان كەزدە ورىندالادى. كوميتەت مۇنداي كەشىگۋلەردىڭ ۇشۋ قاۋىپسىزدىگىن قامتاماسىز ەتۋگە باعىتتالعان شارالاردىڭ مىندەتتى بولىگى ەكەنىن اتاپ ءوتتى.
