فوتو: pinterest.com
ەۋرووداق ەلدەرى ۋكرايناعا 90 ملرد ەۋرو كولەمىندە كومەك بەرۋ جونىندە كەلىسىمگە قول جەتكىزدى. بۇل تۋرالى ەۋروپالىق كەڭەس توراعاسى انتونيۋ كوشتا ح الەۋمەتتىك جەلىسىندەگى پاراقشاسىندا حابارلادى. ونىڭ ايتۋىنشا, شەشىم رەسمي تۇردە ماقۇلدانىپ, وداق ءوز مىندەتتەمەسىن ورىنداۋعا كىرىسكەن.
بەرىلەتىن قاراجات نەسيە تۇرىندە ۇسىنىلادى جانە ەۋرووداقتىڭ ورتاق بيۋدجەتى ارقىلى قامتاماسىز ەتىلەدى. انتونيۋ كوشتانىڭ مالىمدەۋىنشە, بۇل قارجى ۋكرايناعا ەڭ الدىمەن اعىمداعى بيۋدجەت تاپشىلىعىن جابۋعا جانە سوعىس سالدارىنان تۋىنداعان قارجىلىق قىسىمدى ازايتۋعا مۇمكىندىك بەرەدى.
سونىمەن قاتار ەۋرووداق اتالعان نەسيەنى وتەۋ ءۇشىن رەسەيدىڭ بۇعاتتالعان اكتيۆتەرىن پايدالانۋ قۇقىعىن وزىندە قالدىرىپ وتىر. بۇل تەتىك ەۋرووداق تاراپىنان العاش رەت رەسمي دەڭگەيدە ناقتى ايتىلىپ وتىر.
گەرمانيا كانتسلەرى فريدريح مەرتستىڭ تۇسىندىرۋىنشە, ۋكراينا بۇل نەسيەنى تەك رەسەي سوعىس سالدارىنان كەلتىرىلگەن شىعىندى وتەگەن جاعدايدا عانا قايتارۋعا ءتيىس. ال ەگەر ماسكەۋ وتەماقى تولەۋدەن باس تارتسا, قارىزدى جابۋ ءۇشىن رەسەيدىڭ ەۋرووداق اۋماعىندا بۇعاتتالعان اكتيۆتەرى پايدالانىلماق.
ايتا كەتەيىك, بۇعان دەيىن ەۋرووداق كەڭەسى رەسەي اكتيۆتەرىنەن قاراجاتتى ەلگە قايتارۋعا ۋاقىتشا تىيىم سالعان ەدى. بۇل شەكتەۋ ۋكرايناداعى سوعىس سالدارىنان ەۋرووداق ەكونوميكاسىنا تونەتىن تاۋەكەلدەر ساقتالعان كەزەڭ بويى كۇشىندە بولادى. سول كۇنى رەسەيدىڭ ورتالىق بانكى Euroclear كومپانياسىنا قارسى ماسكەۋ سوتىنا تالاپ-ارىز تۇسىرگەن.
