فوتو: اشىق دەرەككوز
مەملەكەت باسشىسى ءوز سوزىندە حيروسيما, ناگاساكي جانە سەمەي قاسىرەتى يادرولىق قارۋعا جاۋاپكەرشىلىكپەن قاراپ, ۇستامدىلىق تانىتۋدىڭ قانشالىقتى ماڭىزدى ەكەنىن ايتتى.
«قازاقستان تاۋەلسىزدىك العاننان كەيىن سەمەي يادرولىق پوليگونىن جابۋ جانە الەمدەگى ءتورتىنشى يادرولىق ارسەنالدان باس تارتۋ تۋرالى تاريحي شەشىم قابىلدادى. بۇل ءبىزدىڭ وسالدىعىمىز ەمەس. كەرىسىنشە, ستراتەگيالىق كورەگەندىك تانىتىپ, وسى ارقىلى بەيبىتشىلىك پەن ادامزات قاۋىپسىزدىگى ماڭىزدى ەكەنىن كورسەتتىك. ارادا وتىز جىلدان اسا ۋاقىت وتسە دە, وسى ۇستانىمنان اينىعان جوقپىز: جاھاندىق قاۋىپسىزدىك جۇيەسىن يادرولىق قارۋمەن ۇستاپ تۇرۋعا بولمايدى. حالىقارالىق قوعامداستىق جاپپاي يادرولىق قارۋسىزدانۋ باعىتىندا بەلسەندى ارەكەت ەتىپ, يادرولىق سىناقتارعا جان-جاقتى تىيىم سالۋ تۋرالى شارتتىڭ كۇشىنە ەنۋىنە ۇلەس قوسۋعا ءتيىس. قازاقستان جاپپاي قىرىپ-جوياتىن قارۋى بار الپاۋىت ەلدەر اراسىنداعى جوعارى دەڭگەيلى ديالوگتى قايتا باستاۋعا ۇندەيدى. سونداي-اق يادرولىق قارۋدى قولدانۋ نەمەسە سىناۋ قاۋپىن جويۋ ءۇشىن اناعۇرلىم باتىل ءارى كوپجاقتى ارەكەتكە شاقىرادى. قازاقستان مەن جاپونيانىڭ بۇل تۇرعىدا الەم الدىندا ءجۇزى جارقىن. ەلدەرىمىز يادرولىق الپاۋىت مەملەكەتتەر مامىلەگە كەلە الماي جاتقان كەزدە قاراما-قايشىلىقتاردى رەتتەپ, پراگماتيكالىق تۇرعىدان كوشباسشى ەكەنىن كورسەتە الار ەدى», دەدى پرەزيدەنت.
سونىمەن قاتار قاسىم-جومارت توقاەۆ بۇۇ ۋنيۆەرسيتەتى جي سالاسىنداعى حالىقارالىق زەرتتەۋلەردى ىلگەرىلەتۋدە بىرەگەي مۇمكىندىككە يە ەكەنىن ايتتى.
مەملەكەت باسشىسى قازاقستاننىڭ بۇۇ اياسىندا حالىقارالىق سۋ ۇيىمىن قۇرۋ تۋرالى باستاما كوتەرگەنىن ەسكە سالدى. سونداي-اق بۇۇ ۋنيۆەرسيتەتىنە وسى ىزگى ءىستى قولداپ, عىلىمي زەرتتەۋلەرگە بەلسەندى اتسالىسۋدى ۇسىندى.
كەلەشەك تۋرالى وي قوزعاعان قاسىم-جومارت توقاەۆ جاساندى ينتەللەكتىنى قازىرگى زامان كەلبەتىن قالىپتاستىراتىن شەشۋشى كۇشتىڭ ءبىرى دەپ اتادى.
ايتسە دە, ونىڭ پىكىرىنشە, جي-ءدىڭ قاۋپى دە جوق ەمەس. وعان جۇرتشىلىقتىڭ تەڭدەي قول جەتكىزە الماۋى جانە تەرىس پيعىلدا, سونىڭ ىشىندە اسكەري ماقساتتا قولدانۋى سەبەپ بولۋى ىقتيمال.
«بىرىككەن ۇلتتار ۇيىمى كەزىندە يادرولىق قاۋىپسىزدىك پەن ازاماتتىق اۆياتسيا سالالارىندا جالپىعا بىردەي نورمالاردى قالىپتاستىردى. سول سەكىلدى ەندى بۇل ىستە دە نەگىزگى ۇيلەستىرۋشى ءرولىن اتقارۋعا ءتيىس. الەمنىڭ جەتەكشى تەحنولوگيالىق ورتالىقتارىنىڭ بىرىندە ورنالاسقان جاھاندىق وقۋ ورنى رەتىندە بۇۇ ۋنيۆەرسيتەتى جي-ءدىڭ الەۋەتىنە, قاۋىپ-قاتەرىنە جانە ونى باسقارۋعا قاتىستى حالىقارالىق زەرتتەۋلەردى ىلگەرىلەتۋدە بىرەگەي مۇمكىندىككە يە», دەدى پرەزيدەنت.ايتا كەتەيىك مەملەكەت باسشىسى توكيو قالاسىنداعى بىرىككەن ۇلتتار ۇيىمى ۋنيۆەرسيتەتىنە بارىپ, «دۇربەلەڭگە تولى داۋىردەگى ستراتەگيالىق سەنىمدى قالپىنا كەلتىرۋ: ادىلەتتى ءارى تۇراقتى الەم قۇرۋ جولىنداعى قازاقستاننىڭ ۇستانىمى» تاقىرىبىندا ءدارىس وقىدى.
