فوتو: اقوردا
«وسى ايتۋلى وقۋ ورنىندا ايماقتاعى ەلدەر اراسىنان العاشقى ءدارىس وقىعان مەملەكەت باسشىسى اتانۋ – مەن ءۇشىن زور مارتەبە. مۇنى حالىقارالىق ارەناداعى ءرولى ارتىپ كەلە جاتقان قازاقستانعا شىنايى قۇرمەت دەپ قابىلدايمىن. سونداي-اق ءبىزدىڭ مۋلتيلاتەراليزمدى ىلگەرىلەتۋگە ءارى جاھاندىق قاۋىپسىزدىكتى قولداۋعا باعىتتالعان تاباندى ەڭبەگىمىزدى مويىنداۋدىڭ بەلگىسى رەتىندە قاراستىرامىن. بىرىككەن ۇلتتار ۇيىمى مەنىڭ ومىرىمدە ەرەكشە ورىن الادى. ويتكەنى وسى ۇيىمدا باس حاتشىنىڭ ورىنباسارى جانە جەنەۆاداعى وكىلدىكتىڭ باس ديرەكتورى, قارۋسىزدانۋ جونىندەگى كونفەرەنتسيانىڭ باس حاتشىسى لاۋازىمدارىن اتقارۋ باقىتىنا يە بولدىم», دەدى پرەزيدەنت.
مەملەكەت باسشىسى ۋنيۆەرسيتەت ۇجىمىن وقۋ ورنىنىڭ قۇرىلعانىنا 50 جىل تولۋىمەن قۇتتىقتاپ, بۇۇۋ-دىڭ بۇكىل حالىقارالىق قوعامداستىقتىڭ يگىلىگى ءۇشىن ناقتى شەشىمدەر ازىرلەۋگە قوسقان ۇلەسىن اتاپ ءوتتى. قاسىم-جومارت توقاەۆ ءوزى ۇستاناتىن قاعيداتتار مەن جاپون ەتيكاسى اراسىنداعى ۇندەستىككە توقتالدى. ياعني ۇيلەسىمدىلىك, دانالىق جانە جاۋاپتى كوشباسشىلىق – شىنايى كۇش-قۋاتتىڭ قاينارى.
«حانزادا سيوتوكۋ VII عاسىردا «ۇيلەسىمدىلىك بارىنەن بيىك باعالانۋعا ءتيىس» دەپ جازدى. بۇگىندە بۇل قاعيدات مەملەكەتتىك باسقارۋدا جانە حالىقارالىق قاتىناستاردا باستى ءرول اتقارىپ, قازاقستاننىڭ سىرتقى ساياساتىندا ايقىن كورىنىس تاۋىپ وتىر», دەدى پرەزيدەنت.مەملەكەت باسشىسى داعدارىس بەلەڭ العان جانە كوپجاقتى ىنتىماقتاستىق تەتىكتەرى ايتارلىقتاي السىرەگەن قازىرگى كەزدە ادىلەتتى ءارى تۇراقتى الەم قۇرۋ جونىندەگى وي-پىكىرىمەن ءبولىستى.
«سوڭعى ون جىلدا جەر جۇزىندە قارۋلى قاقتىعىستار كوبەيىپ, ۋشىعىپ كەتتى. الەمدەگى اسكەري شىعىندار بىلتىر 2,7 تريلليون دوللاردى قۇراعان. بۇرىن-سوڭدى مۇنداي بولماعان. سونىمەن قاتار الپاۋىت ەلدەر اراسىنداعى ستراتەگيالىق باقتالاستىق شىرقاۋ شەگىنە جەتتى. سونىڭ سالدارىنان بۇۇ قاۋىپسىزدىك كەڭەسى قانداي دا ءبىر ءىرى حالىقارالىق قاقتىعىستاردى شەشە المايتىن دارمەنسىز كۇيگە ءتۇستى», دەدى قاسىم-جومارت توقاەۆ.
