فوتو: istockphoto.com
ءمينيستردىڭ ايتۋىنشا, تارتىلعان ينۆەستيتسيالار مەن حالىقارالىق كەلىسىمدەر سۋ قاۋىپسىزدىگىن قامتاماسىز ەتۋدىڭ باستى كەپىلى بولادى. قازىرگى تاڭدا مينيسترلىك شەتەلدىك سەرىكتەستەرمەن 7 ءىرى كەلىسىم مەن 30-دان استام مەموراندۋمعا قول قويعان. بۇل قۇجاتتاردىڭ ىشىندە ەڭ ماڭىزدىسى – ازيا دامۋ بانكىمەن بىرلەسە جۇزەگە اسىرىلاتىن ەسىل قارسى رەتتەگىشىنىڭ قۇرىلىسى.
«قول قويىلعان مەموراندۋمداردىڭ ىشىندە قىتايلىق سەرىكتەستەرمەن جامبىل وبلىسىندا سمارت-تەحنولوگيالار شىعاراتىن زاۋىت سالۋ بويىنشا $20 ملن ىنتىماقتاستىق نيەتىن, سونداي-اق ازيا دامۋ بانكىمەن ەسىل قارسى رەتتەگىشى قۇرىلىسىنا قارجى ءبولۋ تۋرالى مەموراندۋمدى ەرەكشە اتاپ وتۋگە بولادى. اتالعان نىسان 873 ملن تەكشە مەترگە دەيىن تاسقىن سۋ جيناۋعا مۇمكىندىك بەرەدى, بۇل سولتۇستىك قازاقستان وبلىسىنداعى ەلدى مەكەندەردى سۋ باسۋ قاۋپىنەن ساقتايدى», دەدى نۇرجان نۇرجىگىتوۆ.
وسىلايشا, مەملەكەت ميللياردتاعان ينۆەستيتسيانى تەك ينفراقۇرىلىمعا ەمەس, تابيعي اپاتتاردىڭ الدىن الۋعا باعىتتاپ وتىر.
بۇعان دەيىن ەلىمىزدە 2026 جىلى ءۇش وبلىستا جاڭا سۋ قويمالارى بوي كوتەرەتىنىن حابارلاعان ەدىك. سونىمەن قاتار بيىل سۋ سالاسى قىزمەتكەرلەرىنىڭ جالاقىسى 50%-عا دەيىن ارتتى.
