فوتو: اشىق دەرەككوز
مۇنايلى استانانىڭ ساۋلەتتىك كەلبەتىن وزگەرتەتىن جاڭا عيماراتتىڭ بيىكتىگى 130 مەتردى قۇرايدى. جوبا اۆتورلارىنىڭ ايتۋىنشا, قالانىڭ تەڭىز دەڭگەيىنەن تومەن ورنالاسۋ ەرەكشەلىگىنە بايلانىستى, ءزاۋلىم ءۇيدىڭ 32-قاباتىنان كاسپي تەڭىزىن تاماشالاۋ مۇمكىن بولادى.
كەشەن قۇرامىندا 600 نومىرلىك بەسجۇلدىزدى قوناقۇي, 12 مىڭ شارشى مەتردەن استام كوممەرتسيالىق الاڭدار, 500 ورىندىق كونفەرەنتسيا زالى, سونداي-اق SPA, فيتنەس ورتالىقتارى مەن مەيرامحانالار قاراستىرىلعان.
«TEXOL GROUP» ديرەكتورلار كەڭەسىنىڭ توراعاسى شوتا ابحازاۆانىڭ ايتۋىنشا, جوبانىڭ باستى ماقساتى – وڭىردەگى ساپالى قوناقۇي ينفراقۇرىلىمىنىڭ تاپشىلىعىن جويۋ. قازىرگى تاڭدا اتىراۋدا حالىقارالىق جەلىلىك بەسجۇلدىزدى قوناقۇيلەردىڭ جوقتىعىن ەسكەرە وتىرىپ, كومپانيا بۇل ولقىلىقتىڭ ورنىن تولتىرۋدى كوزدەپ وتىر.
جوبانىڭ ەڭ ەرەكشە تۇسى – اتىراۋدىڭ گەوگرافيالىق ورنالاسۋىن ايشىقتايتىن, ەۋروپا مەن ازيا قۇرلىقتارىنىڭ اراسىندا جىلدام وتۋگە مۇمكىندىك بەرەتىن زيپلاين اتتراكتسيونى بولماق. سونىمەن قاتار كەشەندە جاسىل باقتار سالىنىپ, جاڭارتىلاتىن ەنەرگيا كوزدەرى پايدالانىلادى.
قازىرگى ۋاقىتتا دايىندىق جۇمىستارى باستالىپ كەتتى: 16 قاراشادان بەرى ەسكى قوناقۇي عيماراتىنىڭ ارتقى بولىگىن بۇزۋ جۇمىستارى جۇرگىزىلىپ جاتىر. «اق-جايىق» جوباسى قالانى مۇناي سەكتورىنا تاۋەلدىلىكتەن ارىلتىپ, تۋريزم مەن بيزنەس سالاسىن دامىتۋعا باعىتتالعان «ارمان قالا» كونتسەپتسياسىنىڭ ماڭىزدى بولىگى سانالادى.
