جاقىندا التايدىڭ ارعى جاعىنداعى اعايىننىڭ ساعىنىشقا تولى ءان كەرۋەنى باي-ولكەدەن اتاجۇرتقا ات باسىن تىرەپ, تەمىرتاۋ جۇرتشىلىعىنا عاجاپ كەش, بايراقتى رۋح سىيلادى.
قازاقى ءان ءداستۇرىنىڭ قالپىن بۇزباي, ۇلتتىق بولمىستى بەرىك ساقتاعان ونەرپازداردى قالا تۇرعىندارى زور قوشەمەتپەن قارسى العانى سونشالىق, تەمىرتاۋ مادەنيەت سارايىنداعى ۇلكەن زالدا ينە شانشار ورىن بولمادى.
كەش يەسى, موڭعوليا مادەنيەتىنىڭ وزات قىزمەتكەرى اقتانبەردى ازات ۇلى – تەرمە ونەرىنىڭ تانىمال وكىلى, ءان قورجىنىندا 130-دان استام تۋىندى بار شەبەر ورىنداۋشى.
ونەرپازدار قاتارىندا بۇلبۇل ءۇندى, موڭعوليا مەملەكەتىنىڭ وزات قىزمەتكەرى ساتتىگۇل قۇمارحانقىزى, قوڭىر داۋىستى وپەرا ءانشىسى ماناتحان تىلەگەن ۇلى, سىرلى ءۇندى مولدابەك ابىلايحان ۇلى جانە جاس سازگەر ورازبەك سەيتاحمەت ۇلى بولدى. ولاردىڭ ورىنداۋىنداعى باي-ولكەدەن جەتكەن اۋەندەر وزىنە ءتان ماقامى, وزگەشە يىرىمىمەن ەرەكشەلەنىپ, تىڭدارماندى بىردەن باۋراپ الدى. ءبىر قىزىعى, كورەرمەن دە كونە اندەردىڭ اۋەنىنە قوسىلىپ وتىردى.
قۇرىش قالانىڭ تۇرعىندارى الىستاعى اعايىننىڭ ونەرىن اڭساپ كۇتكەنىن كورسەتكەندەي, كەش بويى ەرەكشە ىقىلاس كورسەتۋمەن بولدى. زال تولى كورەرمەننىڭ كولدەي كوڭىلى مەن قۋانىشى قۇددى ءبىر باي-ولكەدەگى قازاق اۋىلىنىڭ دۋماندى كەشىندەي ءوتتى. كورەرمەندەر شات-شادىمان كۇيگە بولەنىپ, كوشپەلى ءومىردىڭ كونە سارىندارىن جۇرەگىمەن تىڭدادى. التايدىڭ باۋرايىن ساعىنعان اعايىن ءان-جىرمەنەن ءبىر سەرپىلىپ قالدى.
« ۇلى سوزگە باس يەتىن اعايىن, ءبىز سىزدەردى اڭساپ كەلدىك. سىزدەردىڭ بىزگە, بىزدەردىڭ سىزگە دەگەن ساعىنىشتى وسى ءبىر دۋماندى كەشپەن باسايىق دەدىك. ءبىز وسىنشا كورەرمەن جينايمىز دەپ كۇتپەدىك. وسى ورايدا ۇلكەن قولداۋ كورسەتىپ, تاماشا كەشتىڭ وتۋىنە ۇلەس قوسقان تەمىرتاۋلىق اقىن قىزدارىڭىز تاڭساۋلە اگەنقىزىنا ايتار العىسىمىز شەكسىز. جالپى, قورجىنىمدا 130-عا جۋىق تەرمە بار. تەرمە جانرى – قوعام ايناسى. سول سەبەپتى, ونەگەلى وسى ءبىر ونەرىمىز ارقىلى وي سالا بىلسەك, جۇرەكتەرىڭىزگە ساۋلە جاعا الساق, ءبىز ءۇشىن ودان اسقان ولجا جوق», دەدى كەش يەسى اقتانبەردى ازات ۇلى.
قاراعاندى وبلىسى
