ءبىلىم ورداسىندا ارنايى جابدىقتالعان شاحمات كابينەتى اشىلىپ, ءار قاباتتىڭ فويەسىنە وقۋشىلاردىڭ قولجەتىمدى تۇردە ويناۋىنا ارنالعان شاحمات تاقتالارى ورناتىلدى. شاحمات – بالانىڭ كورنەكى-بەينەلى ويلاۋىن دامىتىپ, شەشىم قابىلداۋ, تالداۋ مەن تاباندىلىق داعدىلارىن قالىپتاستىراتىن ينتەللەكتۋالدى ويىن. سوندىقتان مەكتەپتە بۇل باعىتقا قىزىعۋشىلىق ارتىپ وتىر. قازىرگى تاڭدا 1-4 سىنىپتان 150 وقۋشى, 5-7 سىنىپتان 45 وقۋشى تۇراقتى تۇردە ۇيىرمەگە قاتىسادى.
مەكتەپ ديرەكتورى ايگۇل ابايقىزى بۇل باستامانىڭ ماڭىزى ەرەكشە ەكەنىن ايتتى.
«شاحمات – جاي عانا ويىن ەمەس, بالانىڭ مي قابىلەتىن شىڭدايتىن قۇرال. ۇيىرمەگە قاتىسىپ جۇرگەن وقۋشىلاردىڭ ساباققا ىنتاسى ارتىپ, ويلاۋ جىلدامدىعى, زەيىنى جاقسارعانىن بايقايمىز. اتا-انالاردىڭ دا قىزىعۋشىلىعى جوعارى. ولار بالاسىنىڭ بوس ۋاقىتىن ءتيىمدى وتكىزىپ, وزىنە سەنىمدى بولا ءتۇسۋىن قولدايدى. ءبىز ءۇشىن ءار جەتكىنشەكتىڭ جان-جاقتى دامۋى – باستى ماقسات», دەدى مەكتەپ باسشىسى.
وقۋشىلاردىڭ شاحماتقا سۇيىسپەنشىلىگىن ارتتىرۋ ماقساتىندا جاقىندا مەكتەپكە حالىقارالىق گروسسمەيستەر نۇرلان ىبراەۆ كەلىپ, جاس شاحماتشىلارعا شەبەرلىك ساباعىن وتكىزدى. بۇل ءىس-شارا اتا-انالار مەن بالالاردىڭ ينتەللەكتۋالدى ويىنعا ىنتاسىن ارتتىرا ءتۇستى.
ايتا كەتەيىك, ەلىمىزدە 42 مەكتەپتە شاحمات ءپان رەتىندە وقىتىلادى, ال 1500-گە جۋىق ءبىلىم ورداسىندا ۇيىرمەلەر جۇمىس ىستەيدى. 2027 جىلعا دەيىنگى كەشەندى جوسپار اياسىندا تۇركىستان وبلىسىنداعى شاحمات ۇيىرمەلەرىنىڭ سانى ودان ءارى ارتپاق. ءبىر سوزبەن ايتقاندا, شاحمات – بالانىڭ بولاشاعىن وزگەرتە الاتىن ينتەللەكتۋالدى ينۆەستيتسيا.
سۇلتانبەك نۇرلان,
تۇركىستان وبلىسى ءبىلىم باسقارماسىنىڭ ءباسپاسوز حاتشىسى
