باس پروكۋراتۋرانىڭ مالىمەتىنشە, اتالعان تۇلعالار قىلمىستىق-پروتسەستىك كودەكستە كوزدەلگەن زاڭدى تەرگەۋ ارەكەتتەرىن, اتاپ ايتقاندا, جاۋاپ الۋعا قاتىسۋ, جاۋاپ الۋدى جۇرگىزۋ, سونداي-اق سوتتىڭ ۇيقاماق تۇرىندەگى بۇلتارتپاۋ شاراسىن تاڭداۋ سياقتى پروتسەسسۋالدىق شەشىمدەردى ادەيى ازاپتاۋ رەتىندە كورسەتىپ, قوعامدى اداستىرىپ وتىر.
ۆەدومستۆو قازاقستان زاڭناماسىندا «ازاپتاۋ» ۇعىمىنىڭ ناقتى ايقىندالعانىن اتاپ ءوتتى. قىلمىستىق كودەكستىڭ 146-بابىنا سايكەس, ازاپتاۋ دەپ لاۋازىمدى تۇلعانىڭ ءتان نەمەسە پسيحيكالىق زارداپتى قاساقانا كەلتىرۋى تانىلادى. بۇل انىقتاما قازاقستان راتيفيكاتسيالاعان بۇۇ-نىڭ ازاپتاۋلارعا جانە باسقا دا قاتىگەز, ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەر مەن جازالاۋ تۇرلەرىنە قارسى كونۆەنتسياسىنىڭ, سونداي-اق ىستامبۇل حاتتاماسىنىڭ نورمالارىنا تولىق سايكەس كەلەدى.
قازىرگى تاڭدا پروكۋراتۋرا ورگاندارى تاراپىنان اتالعان قىلمىستىق ىستەردىڭ قاتىسۋشىلارىنا قاتىستى تەرگەۋشىلەردىڭ زاڭسىز ارەكەتتەرى نەمەسە ازاپتاۋ فاكتىلەرى تىركەلمەگەن. بارلىق پروتسەسسۋالدىق ارەكەتتەر قىلمىستىق-پروتسەستىك كودەكستىڭ تالاپتارىن قاتاڭ ساقتاي وتىرىپ جۇرگىزىلىپ جاتىر.
باس پروكۋراتۋرانىڭ مالىمدەۋىنشە, جالعان اقپارات تاراتىپ وتىرعان تۇلعالار وزدەرىنە ءتيىمدى قوعامدىق پىكىر قالىپتاستىرۋدى, قۇقىق قورعاۋ ورگاندارىنىڭ بەدەلىن ءتۇسىرۋدى جانە قىلمىستىق ىستەردى تولىق, جان-جاقتى ءارى وبەكتيۆتى تەرگەۋگە كەدەرگى كەلتىرۋدى كوزدەپ وتىر.
وسىعان بايلانىستى باس پروكۋراتۋرا كورىنەۋ جالعان اقپارات تاراتقانى, سونداي-اق سوتقا دەيىنگى تەرگەپ-تەكسەرۋدى جۇزەگە اسىراتىن تۇلعالاردىڭ قىزمەتىنە قانداي دا ءبىر تۇردە ارالاسقانى ءۇشىن قىلمىستىق جاۋاپتىلىق كوزدەلگەنىن ەسكەرتتى.
ەسكە سالايىق, بۇعان دەيىن كازتاگ اگەنتتىگىنىڭ باس رەداكتورى پوليتسەيدىڭ ۇستىنەن ء«تونىپ تۇرعانىن» ازاپتاۋعا تەڭەگەنىن مالىمدەگەن بولاتىن. ال Orda.kz باسىلىمىنىڭ ادۆوكاتى مۇرات ادام باس رەداكتورعا قولدانىلعان ۇيقاماقتى ازاپتاۋمەن تەڭەستىردى.
