ءمينيستردىڭ ايتۋىنشا, سوڭعى كۇندەرى كەيبىر قىلمىستىق ىستەرگە حالىقارالىق نازار اۋدارتۋ ماقساتىندا «ازاپتاۋ» تۋرالى نەگىزسىز اقپاراتتار ادەيى تاراتىلىپ جاتىر. اتالعان ىستەر بويىنشا جاۋاپكەرشىلىككە تارتىلعانداردىڭ اراسىندا مەديا سالانىڭ وكىلدەرى دە بار.
ايدا بالاەۆا 2022 جىلدان بەرى قازاقستاندا مەديا جانە اقپارات سالاسىنداعى زاڭنامانى جەتىلدىرۋگە باعىتتالعان جۇيەلى رەفورمالار جۇزەگە اسىرىلىپ كەلە جاتقانىن اتاپ ءوتتى. بۇل وزگەرىستەر جۋرناليستەردىڭ كاسىبي مارتەبەسىن ارتتىرۋعا جانە ولاردىڭ قۇقىقتىق تۇرعىدا قورعالۋىن كۇشەيتۋگە باعىتتالعان.
سوعان قاراماستان, كەيىنگى ۋاقىتتا اقپاراتتىق كەڭىستىكتە جۋرناليستەر مەن بۇقارالىق اقپارات قۇرالدارىنا «جۇيەلى قىسىم كورسەتىلىپ جاتىر» دەگەن مالىمدەمەلەر ءجيى ايتىلىپ جۇرگەنىن ايتتى. كەيبىر قىلمىستىق ىستەردىڭ فيگۋرانتتارى مەن ولاردىڭ قورعاۋشىلارى تەرگەۋ بارىسىندا ازاپتاۋ بولعانى تۋرالى دالەلسىز ايىپتار تاعىپ وتىر. مۇنداي مالىمدەمەلەر قوعام مەن شەتەلدىك قۇقىق قورعاۋ ۇيىمدارىن جاڭساق پىكىرگە جەتەلەۋى مۇمكىن.
مينيستر ادام قۇقىقتارىنىڭ بۇزىلۋى تۋرالى كەز كەلگەن تۇجىرىم ناقتى فاكتىلەرگە, دالەلدەرگە جانە زاڭ تالاپتارىنا نەگىزدەلۋى ءتيىس ەكەنىن اتاپ ءوتتى. ونىڭ ايتۋىنشا, ەموتسياعا نەمەسە قوعام نازارىن اۋدارۋعا باعىتتالعان ارەكەتتەرگە جول بەرۋگە بولمايدى.
«مەملەكەت ءسوز بوستاندىعى مەن بۇقارالىق اقپارات قۇرالدارىنىڭ ەركىندىگىن قازاقستان رەسپۋبليكاسىنىڭ كونستيتۋتسياسىندا جانە حالىقارالىق مىندەتتەمەلەردە بەكىتىلگەن نەگىزگى قۇندىلىقتار رەتىندە ۇستانادى. الايدا ءسوز ەركىندىگى زاڭ تالاپتارىن ەلەمەۋگە نەمەسە جاۋاپكەرشىلىكتەن جالتارۋعا مۇمكىندىك بەرمەيدى. بۇل قاعيدا بارلىق قۇقىقتىق مەملەكەتتەرگە ورتاق», دەدى ايدا بالاەۆا.
ونىڭ سوزىنشە, جۋرناليستەردىڭ قىزمەتىنە, باق جۇمىسىنا نەمەسە ناقتى قىلمىستىق ىستەرگە قاتىستى بارلىق ماسەلەلەر زاڭ اياسىندا, پروتسەسسۋالدىق نورمالار تولىق ساقتالا وتىرىپ, كىناسىزدىك پرەزۋمپتسياسى مەن قورعاۋ قۇقىعى قامتاماسىز ەتىلە وتىرىپ قارالادى.
مينيستر قازاقستاندا ەشكىم كاسىبي قىزمەتى ءۇشىن قۋدالاۋعا ۇشىرامايتىنىن اتاپ ءوتتى. تەرگەۋ جانە پروتسەسسۋالدىق ارەكەتتەردى ءسوز بوستاندىعىنا قىسىم رەتىندە كورسەتۋ قوعامدىق پىكىردى ادەيى بۇرمالاۋ بولىپ سانالاتىنىن ايتتى.
سونداي-اق اتالعان ىستەر بەلگىلى ءبىر كوزقاراستارعا نەمەسە رەداكتسيالىق ساياساتقا ەمەس, جەكەلەگەن ازاماتتاردىڭ ناقتى قۇقىقتىق تالاپتارىنا بايلانىستى قارالىپ جاتقانىن جانە ولاردى ۋاكىلەتتى ورگاندار زاڭ شەڭبەرىندە تەكسەرىپ جاتقانىن جەتكىزدى.
ايدا بالاەۆا مادەنيەت جانە اقپارات مينيسترلىگى ءوز قۇزىرەتى شەڭبەرىندە جۋرناليستەردىڭ قۇقىقتارىن قورعاۋعا جانە ىستەردىڭ ءادىل ءارى اشىق سوتتا قارالۋىنا بارلىق قاجەتتى جاعداي جاساۋعا دايىن ەكەنىن مالىمدەدى.
وسىعان بايلانىستى مينيستر حالىقارالىق ۇيىمداردى, بۇقارالىق اقپارات قۇرالدارىن جانە قوعامدى تەرگەۋ اياقتالعانعا دەيىن اسىعىس قورىتىندى جاساماۋعا شاقىردى. ونىڭ ايتۋىنشا, راستالماعان اقپارات تاراتۋ مەن تەرگەۋ ورگاندارىنا قىسىم جاساۋ ەل ىشىندەگى تۇراقتىلىققا نۇقسان كەلتىرۋى مۇمكىن.
«ەگەر سوتتا ايىپتىلاردىڭ كىناسى دالەلدەنسە, جاساعان ارەكەتتەرىنە ساي زاڭ الدىندا ءتيىستى جازاسىن الارى ءسوزسىز», دەدى مينيستر.
