فوتو: اشىق دەرەككوز
ايدا بالاەۆانىڭ ايتۋىنشا, ۇلت دەنساۋلىعى – مەملەكەتتىڭ باستى بايلىعى, ال مىندەتتى الەۋمەتتىك مەديتسينالىق ساقتاندىرۋ جۇيەسى ءاربىر ازاماتتىڭ دەنساۋلىعىن قورعاۋعا باعىتتالعان ماڭىزدى قۇرال بولىپ تابىلادى.
«2026 جىلدان باستاپ ساقتاندىرىلعان ازاماتتار مىندەتتى مەديتسينالىق ساقتاندىرۋ شەڭبەرىندە جوسپارلى مەديتسينالىق قىزمەتتەردى تولىق كولەمدە الا الادى. بۇل جۇيە ازاماتتاردىڭ قارجىلىق تاۋەكەلدەرىن ازايتىپ, دەنساۋلىق ساقتاۋ سالاسىن ساپالى جاڭا دەڭگەيگە كوتەرەدى», دەدى مينيستر.
ءمينيستردىڭ مالىمەتىنشە, قازىرگى تاڭدا قازاقستاندا 17 ميلليونعا جۋىق ادام, ياعني حالىقتىڭ 82 پايىزدان استامى ءمامس جۇيەسىندە ساقتاندىرىلعان. ونىڭ ىشىندە 12 ميلليوننان استام ازامات جەڭىلدىك ساناتىنا كىرەدى, ال 4,5 ميلليوننان استامى جارنالارىن وزدەرى تولەپ وتىر.
ء«بىزدىڭ مىندەتىمىز وسى ءتىزىمدى ودان ءارى ارتتىرۋ. سوندىقتان جۇيەگە ءالى كىرمەگەن ازاماتتاردى مىندەتتى مەديتسينالىق ساقتاندىرۋ مۇمكىندىكتەرىمەن مۇقيات تانىسۋعا شاقىرامىن», دەدى ايدا بالاەۆا.
مينيستر 2026 جىلدان باستاپ ءمامس پاكەتىنە بىرقاتار سوزىلمالى اۋرۋلار ەنگىزىلەتىنىن اتاپ ءوتتى. اتاپ ايتقاندا, قانت ديابەتى, بالالاردىڭ تسەرەبرالدى سال اۋرۋى (دتسپ), رەۆماتيزم جانە وزگە دە اۋرۋلار بويىنشا دارىگەر كەڭەستەرى, ءدارى-دارمەكپەن قامتاماسىز ەتۋ جانە ەم شارالارى تولىقتاي ءمامس ەسەبىنەن كورسەتىلەدى.
«مىسالى, ءبىر جارىم ميلليون قازاقستاندىق ارتەريالىق گيپەرتەنزيا دياگنوزىمەن ەسەپتە تۇر. جىل سايىن وسى سىرقاتتىڭ اسقىنۋىنان 50 مىڭنان استام ينسۋلت جانە ينفاركت جاعدايى تىركەلەدى. 2026 جىلدان باستاپ مۇنداي ناۋقاستارعا كورسەتىلەتىن بارلىق قاجەتتى مەديتسينالىق قىزمەتتەر مىندەتتى مەديتسينالىق ساقتاندىرۋ ەسەبىنەن قامتاماسىز ەتىلەدى», دەدى ول.
سونىمەن قاتار, سوزىلمالى بۇيرەك جەتىسپەۋشىلىگى بار ازاماتتارعا دا ايرىقشا قولداۋ كورسەتىلمەك.
«سونداي-اق ەلىمىزدە 25 مىڭنان استام ازامات سوزىلمالى بۇيرەك جەتىسپەۋشىلىگىمەن ءومىر سۇرسە, ولاردىڭ 8 مىڭى گەمودياليزگە مۇقتاج. 2026 جىلدىڭ 1 قاڭتارىنان باستاپ باقىلاۋ, دياگنوستيكا, ءدارى-دارمەكپەن قامتاماسىز ەتۋ, گەمودياليز جانە ءتىپتى بۇيرەك ترانسپلانتاتسياسى مىندەتتى مەديتسينالىق ساقتاندىرۋ پاكەتى ارقىلى ساقتاندىرىلعان ازاماتتارعا قوسىمشا شىعىنسىز قولجەتىمدى بولادى.
قانت ديابەتى الەمدەگى ەڭ كەڭ تاراعان ينفەكتسيالىق ەمەس اۋرۋلاردىڭ ءبىرى. قازاقستاندا بۇل دياگنوزبەن شامامەن بەس ءجۇز مىڭ ادام تىركەۋدە تۇر. بۇل اۋرۋ تۇراقتى باقىلاۋدى تالاپ ەتەدى. مىسالى, اناليز تاپسىرۋ, دارىگەر كەڭەستەرى, ەمدى تۇزەتۋ جانە باسقا دا شارالار.
الداعى جىلدان باستاپ قانت ديابەتى بار ازاماتتاردىڭ ەمدەلۋى مەن ديسپانسەرلىك باقىلاۋى تولىقتاي مىندەتتى مەديتسينالىق ساقتاندىرۋ جۇيەسىنە ەنگىزىلەدى. دەمەك, بارلىق جوسپارلى قابىلداۋلار, قاجەتتى زەرتتەۋلەر مەن ءدارى-دارمەكتەر قوسىمشا تولەمسىز بەرىلەدى. ەڭ باستى شارت ناۋقاس مىندەتتى مەديتسينالىق ساقتاندىرۋ جۇيەسىندە ساقتاندىرىلعان بولۋى كەرەك», دەدى ۆيتسە-پرەمەر.
مينيستر اۋىل تۇرعىندارىنىڭ دا مىندەتتى مەديتسينالىق ساقتاندىرۋمەن تولىق قامتىلىپ وتىرعانىن اتاپ ءوتتى. كوپتەگەن اۋىل ازاماتتارىنىڭ جارنالارى مەملەكەت ەسەبىنەن تولەنىپ, قىمبات دياگنوستيكالىق زەرتتەۋلەر مەن جوعارى تەحنولوگيالىق ەمدەۋ ادىستەرىنە قولجەتىمدىلىك قامتاماسىز ەتىلگەن.
«ەندى 2026 جىلدىڭ 1 قاڭتارىنان باستاپ مىندەتتى مەديتسينالىق ساقتاندىرۋ تۋرالى زاڭنىڭ جاڭا نورماسىنا سايكەس, د جانە ە ساناتىنداعى تومەن تابىستى ادامدار ساقتاندىرىلىپ, دياگنوستيكا مەن ەمدى كەدەرگىسىز الا الادى», دەدى ول.
ءوزىن-ءوزى جۇمىسپەن قامتىعان ازاماتتار ءۇشىن دە جۇيەگە قوسىلۋ جەڭىلدەتىلگەن. ولار ايىنا 4 250 تەڭگە نەمەسە جىلىنا 51 مىڭ تەڭگە تولەي وتىرىپ, ءمامس اياسىنداعى بارلىق قىزمەتتەردى پايدالانا الادى.
«بۇل وزگەرىستەردىڭ باستى ماقساتى ءاربىر ازاماتتىڭ ساپالى جانە ۋاقىتىلى مەديتسينالىق كومەككە قول جەتكىزۋىن قامتاماسىز ەتۋ.
الداعى ۋاقىتتا مىندەتتى مەديتسينالىق ساقتاندىرۋ اياسىن كەڭەيتۋ باعىتىنداعى جۇمىس جالعاسادى. سوندىقتان ءالى ساقتاندىرىلماعان ازاماتتار مىندەتتى مەديتسينالىق ساقتاندىرۋ جۇيەسىنىڭ مۇمكىندىكتەرىمەن جان-جاقتى تانىسۋى اسا ماڭىزدى», دەپ تۇيىندەدى ايدا بالاەۆا.
