فوتو: ۆيدەودان الىنعان كادر
وش وبلىسى قارا-قۇلجا اۋدانىنىڭ تۇرعىنى نۇرزامان المازبەكوۆتىڭ بەلۋاردان كەلەتىن قارمەن ارپالىسىپ, ساباققا اسىققان بەينەروليگى پرەزيدەنتتىڭ جەكە نازارىنا ىلىكتى. قىرعىزستان پرەزيدەنتى اكىمشىلىگىنىڭ اقپاراتتىق ساياسات قىزمەتىنىڭ جەتەكشىسى دايىربەك ورۋنبەكوۆ بۇل جاعدايعا قاتىستى مەملەكەت باسشىسىنىڭ پىكىرىن جەتكىزدى.
«سادىر نۇرعوجو ۇلى بۇل ۆيدەونى ءوزى كورىپ, كۇردەلى جاعدايعا قاراماستان ءبىلىم الۋعا دەگەن نيەتىن كورسەتكەن بالانىڭ قادامىنا وتە ريزا بولدى. پرەزيدەنتىمىز مۇنداي تاباندى ءارى تالانتتى بالالار ەرەكشە قولداۋعا لايىق ەكەنىن اتاپ ءوتىپ, ونى پرەزيدەنتتىك جاڭا جىلدىق شىرشاعا شاقىرۋدى تاپسىردى. سونىمەن قاتار مەملەكەت باسشىسىنىڭ اتىنان بىلىمگە ۇمتىلعان وقۋشىعا ارنالعان سىيلىق دايىندالىپ جاتىر», دەدى دايىربەك ورۋنبەكوۆ.
نۇرزامان – كوو-چاتى اۋىلىنداعى «ايدىڭ-كول» باستاۋىش مەكتەبىنىڭ ۇزدىك وقۋشىلارىنىڭ ءبىرى. ول التى بالالى وتباسىنىڭ ءتورتىنشىسى. مۇعالىمدەرىنىڭ ايتۋىنشا, نۇرزامان ماتەماتيكا مەن قىرعىز ادەبيەتى پاندەرىن جاقسى كورەدى, بوس ۋاقىتىندا سۋرەت سالىپ, فۋتبول ويناعاندى ۇناتادى.
