اق ءۇيدىڭ باسشىسى Truth Social الەۋمەتتىك جەلىسىندەگى جازباسىندا ۆەنەسۋەلا بيلىگىن مۇنداي شەشىمگە جەتكىزگەن سەبەپتەردى ءتىزىپ ايتتى. ونىڭ ايتۋىنشا, ۆەنەسۋەلالىق رەجيم اقش اكتيۆتەرىن زاڭسىز يەمدەنىپ قانا قويماي, تەرروريزمگە, ەسىرتكى كونترابانداسىنا جانە ادام ساۋداسىنا قاتىسى بار.
ء«بىزدىڭ اكتيۆتەرىمىزدى ۇرلاعانى جانە تەرروريزم, ەسىرتكى تاسىمالى مەن ادام ساۋداسى سەكىلدى كوپتەگەن قىلمىستىق ارەكەتتەرى ءۇشىن ۆەنەسۋەلا رەجيمى شەتەلدىك تەرروريستىك ۇيىم دەپ جاريالاندى», دەپ جازدى دونالد ترامپ.
سونىمەن قاتار اقش پرەزيدەنتى ۆەنەسۋەلا توڭىرەگىندەگى اسكەري بەلسەندىلىكتىڭ كۇشەيەتىنىن ەسكەرتتى. ونىڭ ايتۋىنشا, بۇل ەل بۇرىن-سوڭدى بولماعان اۋىر قىسىمعا تاپ بولادى.
«ولار ءۇشىن شوك بۇرىن-سوڭدى بولماعان دەڭگەيدە بولادى. بۇل اقش-قا ۇرلانعان مۇنايدى, جەردى جانە وزگە دە اكتيۆتەردى تولىق قايتارعانعا دەيىن جالعاسادى», دەپ مالىمدەدى ترامپ.
ونىڭ سوزىنشە, نيكولاس مادۋرونىڭ «زاڭسىز رەجيمى» ۇرلانعان مۇناي كەن ورىندارىنان الىنعان رەسۋرستاردى ءوز قىزمەتىن قارجىلاندىرۋعا, سونىڭ ىشىندە ەسىرتكى تەرروريزمىنە, ادام ساۋداسىنا, كىسى ءولتىرۋ مەن ادام ۇرلاۋعا جۇمساپ وتىر.
اقش باسشىسىنىڭ بۇل مالىمدەمەسى حالىقارالىق دەڭگەيدە ۆەنەسۋەلاعا قاتىستى قىسىمنىڭ جاڭا كەزەڭى باستالۋى مۇمكىن ەكەنىن اڭعارتادى.
