فوتو: اشىق دەرەككوز
ۇكىمەت وتىرىسىندا ەنەرگەتيكا ۆيتسە-ءمينيسترى سۇڭعات ەسىمحانوۆتىڭ ايتۋىنشا, 2025 جىلدىڭ قاڭتار–قاراشا ايلارى ارالىعىندا قازاقستاندا 91,9 ملن توننا مۇناي وندىرىلگەن. بۇل وتكەن جىلدىڭ وسى كەزەڭىمەن سالىستىرعاندا 114,1 پايىزدى قۇرايدى. سونىمەن بىرگە مۇناي ەكسپورتتاۋ جوسپارى دا ارتىعىمەن ورىندالعان.
ۆيتسە-ءمينيستردىڭ مالىمەتىنشە, 11 ايدىڭ قورىتىندىسى بويىنشا مۇناي ەكسپورتى 73,4 ملن تونناعا جەتىپ, 2024 جىلعى سايكەس كەزەڭنەن 116,1 پايىزعا ارتقان. وسىلايشا 2025 جىلعا بەلگىلەنگەن 70,5 ملن توننا مۇناي ەكسپورتتاۋ جوسپارى مەرزىمىنەن بۇرىن ورىندالدى.
گاز سالاسىندا دا ءوسىم بايقالادى. قاڭتار–قاراشا ايلارىندا گاز ءوندىرۋ كولەمى 62,8 ملرد تەكشە مەتردى قۇراپ, وتكەن جىلمەن سالىستىرعاندا 116,7 پايىزعا جەتتى. سۇيىتىلعان مۇناي گازىن ءوندىرۋ 2,8 ملن توننا بولدى, بۇل 101,8 پايىزدى قۇرايدى. ەل اۋماعى ارقىلى گاز ءترانزيتى 64,5 ملرد تەكشە مەترگە جەتىپ, وتكەن جىلدىڭ دەڭگەيىنەن 100,9 پايىزعا استى.
مۇناي وڭدەۋ جانە مۇناي-گاز حيمياسى باعىتىندا دا وڭ ديناميكا ساقتالدى. نەفتەپرودۋكتىلەر ءوندىرىسى 14 ملن تونناعا جەتىپ, 106,5 پايىزدى كورسەتتى. ال مۇناي-گاز حيمياسى ونىمدەرىن شىعارۋ كولەمى 567,6 مىڭ توننانى قۇراپ, 112,2 پايىز دەڭگەيىندە قالىپتاستى.
