ۇكىمەت وتىرىسىندا پرەمەر-ءمينيستردىڭ ورىنباسارى, ۇلتتىق ەكونوميكا ءمينيسترى سەرىك جۇمانعارين ەل ەكونوميكاسىنىڭ 11 ايداعى ءوسىمى 6,4 پايىزعا جەتكەنىن مالىمدەدى. ءمينيستردىڭ ايتۋىنشا, ناقتى سەكتورداعى ءوسىم 8,3 پايىزدى قۇراپ, قىزمەت كورسەتۋ سالاسىنىڭ 5,3 پايىزدىق وسىمىنەن ايقىن باسىم ءتۇستى. ەكونوميكانىڭ نەگىزگى درايۆەرلەرى رەتىندە كولىك, قۇرىلىس جانە تاۋ-كەن ونەركاسىبى اتالدى.
ساۋدا كولەمى 11 ايدا 8,8 پايىزعا ارتسا, اۋىل شارۋاشىلىعى 6,1 پايىزدىق ءوسىم كورسەتتى. وڭدەۋ ونەركاسىبىندەگى ءوسىم 5,9 پايىز دەڭگەيىندە قالىپتاستى.
ەكونوميكالىق ءوسىمدى قامتاماسىز ەتىپ وتىرعان باستى فاكتوردىڭ ءبىرى – ينۆەستيتسيا. نەگىزگى كاپيتالعا سالىنعان ينۆەستيتسيا كولەمى 13,3 پايىزعا ۇلعايىپ, 18,5 ترلن تەڭگەگە جەتتى. ونىڭ ىشىندە جەكە ينۆەستيتسيالار 9,8 پايىزعا ارتقان.
مينيستر ينۆەستيتسيا ءوسىمى بولاشاقتاعى ساپالى ەكونوميكالىق دامۋعا نەگىز قالايتىن سالالاردا جوعارى ەكەنىن اتاپ ءوتتى. اتاپ ايتقاندا, قارجى قىزمەتىندە ينۆەستيتسيا 82,8 پايىزعا, ەلەكتر ەنەرگياسىمەن, گازبەن, بۋمەن جانە ىستىق سۋمەن جابدىقتاۋدا 57,9 پايىزعا, ءبىلىم بەرۋ سالاسىندا 31,6 پايىزعا, اقپارات جانە بايلانىس سالاسىندا 24,5 پايىزعا ءوستى. سونداي-اق اۋىل شارۋاشىلىعىندا ينۆەستيتسيا كولەمى 24,1 پايىزعا, وڭدەۋ ونەركاسىبىندە 20,7 پايىزعا, كولىك سالاسىندا 13,3 پايىزعا ارتتى. وڭىرلەر بويىنشا ەڭ جوعارى ءوسىم اقمولا, پاۆلودار, جامبىل, الماتى جانە اقتوبە وبلىستارىندا تىركەلدى. ال اتىراۋ جانە قاراعاندى وبلىستارىندا ينۆەستيتسيا كولەمىنىڭ تومەندەۋى بايقالدى.
ونەركاسىپ قۇرىلىمىنا توقتالساق, ازىق-ت ۇلىك ءوندىرىسى 8,7 پايىزعا, سۋسىندار ءوندىرىسى 9,2 پايىزعا ءوستى. حيميا ونەركاسىبى 8,1 پايىزدىق ءوسىم كورسەتتى. مۇناي وڭدەۋ سالاسىنداعى ءوسىم 6,5 پايىزدى قۇرادى. مەتالل بۇيىمدارىن ءوندىرۋ 12,8 پايىزعا, قۇرىلىس ماتەريالدارىن شىعارۋ 7,1 پايىزعا ارتتى. تاۋ-كەن ونەركاسىبىندەگى ءوسىم 9,7 پايىز دەڭگەيىندە قالىپتاستى.
جالپى العاندا, جاريالانعان دەرەكتەر ەكونوميكانىڭ ءارتاراپتانۋ باعىتى ساقتالىپ, ينۆەستيتسيالىق بەلسەندىلىك پەن ناقتى سەكتوردىڭ ءرولى كۇشەيىپ كەلە جاتقانىن اڭعارتادى.
