سۋرەت: pavlodarnews.kz
شارباقتىنىڭ تۇلەي تۇسكەنىن سىرت كوزدىڭ اڭعارماۋى مۇمكىن ەمەس. الەۋمەتتىك ينفراقۇرىلىمدى نىعايتۋ, حالىقتىڭ تۇرمىسىن ارتتىرۋ, اۋىل شارۋاشىلىعىنا جاڭادان ينۆەستيتسيالار تارتۋ جانە ت.ب. سالالاردا وبلىس بيىل ۇزدىكتەر قاتارىنان كورىنىپ, مەملەكەت باسشىسى بەلگىلەگەن مىندەتتەردىڭ ورنىمەن ورىندالعانىنا كۋا بولدىق.
ادەتتە كەيبىر جەرگىلىكتى اكىمدەر ەسەپ بەرە قالسا, وڭىرلەردىڭ دامۋىندا قاعازدا بار, شىنايى ومىردە جوق كورسەتكىشتەردى ۇزىن-سونار تىزەتىنى ءمالىم. ال مۇندا ات باسىن بۇرساڭىز, ناقتى ىستەردىڭ جۇزەگە اسىرىلعانىنا كوز جەتكىزەسىز.
رەسمي مالىمەتتەرگە سۇيەنسەك, كەيىنگى ەكى جىلدا الەۋمەتتىك سالا مەن ينفراقۇرىلىمدى جاڭعىرتۋ, جاڭادان قۇرىلىس سالۋ بويىنشا 86 جوبا جۇزەگە اسىپ, 8 ملرد تەڭگەدەن استام قارجى جۇمسالعان. ءبىر عاجابى, جاڭعىرتۋ جۇمىستارى نەگىزىنەن اۋدان ورتالىعىندا ەمەس, اۋىلداردا ىسكە اسقان. جول كارتاسى بويىنشا اۋدان جولدارىنىڭ 80 شاقىرىمنان استامى جوندەلىپ, ەلدى مەكەندەردىڭ كوپتەگەن كوشەلەرى بۇتىندەلدى. كەيبىر اۋىلداردا جاياۋ جۇرگىنشىلەر جولدارى, باعدارشامدار پايدا بولدى. جىلىبۇلاق, شالداي, ەسىلباي, كراسيلوۆكا, الەكسەەۆكا, ورلوۆكا, ساحنوۆكا, مالينوۆكا جانە ت.ب. ەلدى مەكەندەردىڭ كوشەلەرى كورىكتەنە ءتۇستى. ءتورت اۋىلدا جاڭادان بالالار الاڭدارى سالىندى.
جاقىن ۋاقىتتا شارباقتى, حمەلنيتسكوە, گالكين, مارالدى, سوسنوۆكا, جىلىبۇلاق اۋىلدارىن قوسا العاندا, 18 ەلدى مەكەننىڭ حالقى ورتالىقتاندىرىلعان اۋىزسۋ جۇيەسىنە قوسىلادى. ناتيجەسىندە, اۋدان حالقىنىڭ 95%-ى اۋىزسۋمەن قامتاماسىز ەتىلەدى.
مۇندا ۇيالى بايلانىس ساپاسى دا جاقسارا تۇسكەن. «250+» باعدارلاماسى اياسىندا اربيگەن, شەگىرەن جانە جاڭاۋىل اۋىلدارىندا قامتۋ دەڭگەيى كۇشەيتىلدى, جىلىبۇلاق, مالينوۆكا جانە سادىقاششى اۋىلدارىندا جاڭا بازالىق ستانسالار ورناتىلسا, سىنتاس اۋىلىندا بايلانىس مۇناراسىنىڭ قۇرىلىسى باستالدى.
وبلىس اكىمى اسايىن بايحانوۆ شارباقتى اۋدانى بارلىق ماكرو كورسەتكىشتەر بويىنشا وڭ ديناميكانى كورسەتىپ وتىرعانىن ايتادى. الەۋمەتتىك ينفراقۇرىلىمدى نىعايتۋ جۇمىستارى دا وڭىمەن جالعاسۋدا. الەكسەەۆكا اۋىلىنداعى شاعىن ورتالىققا, كراسيلوۆكاداعى مەكتەپكە جانە شارباقتىداعى «بالداۋرەن» بالاباقشاسىنا كۇردەلى جوندەۋ جۇرگىزىلدى, وقۋ كابينەتتەرى جاڭا ۇلگىدە جابدىقتالدى. دەنساۋلىق ساقتاۋ سالاسىندا بارلىق اۋىلدىق وكرۋگتەر سانيتارلىق كولىكتەرمەن جانە مەديتسينالىق جابدىقتارمەن قامتاماسىز ەتىلدى. تۇرعىنداردىڭ ءوتىنىشى بويىنشا شارباقتى اۋىلىنداعى دەنە شىنىقتىرۋ-ساۋىقتىرۋ كەشەنىنە كۇردەلى جوندەۋ جۇرگىزۋگە جانە اۋىلدىڭ وڭتۇستىك جاعىندا جاڭا سپورت كەشەنىن سالۋعا 300 ملن تەڭگە ءبولىندى. ماڭىزدى الەۋمەتتىك قادامداردىڭ ءبىرى – ءۇي كەزەگىندە تۇرعان اۋدان تۇرعىندارىنىڭ سانى بيىل ەكى ەسە قىسقارعان.
– ءوڭىر بويىنشا حالىقتىڭ سانى 18 مىڭنىڭ ۇستىندە. كەيىنگى جىلدارى ءۇي كەزەگىندە تۇرعانداردىڭ ماسەلەسىن شەشۋگە كوپ كوڭىل بولىپ وتىرمىز. تەك بيىل 110 ادام جاڭا باسپاناعا يە بولدى. ولارعا ارناپ ءۇش كوپپاتەرلى ۇيلەر تۇرعىزىلىپ, جانىنان سپورت الاڭدارى, بالالارعا ارنالعان ويىن الاڭدارى سالىندى. بۇل يگىلىكتەر ادامي كاپيتالدى دامىتۋعا, حالىقتىڭ جايلى ءومىر سۇرۋىنە ارنالعان, – دەيدى شارباقتى اۋدانىنىڭ اكىمى سەرجان يمانقۇلوۆ.
اۋىل شارۋاشىلىعى – اۋدان ەكونوميكاسىنىڭ نەگىزگى سالاسى. مۇنداعى ءونىمنىڭ جالپى كولەمى 28 ملرد تەڭگەدەن اسىپ تۇسكەن. ءبىر عانا ەگىن شارۋاشىلىعىندا 7,8% ءوسىم بايقالىپ, 16 ملرد تەڭگەگە جەتكەن. بۇل جەتىستىگى ءۇشىن اۋداننىڭ 12 شارۋاشىلىعى مەملەكەتتىك جانە ۆەدومستۆولىق ماراپاتتارعا يە بولدى.
«كەلەسى جىلى جۇمىستار كۇشەيتىلەدى, اسىرەسە وڭدەۋ ونەركاسىبى مەن سۋمەن جابدىقتاۋ باعىتىندا جاندانباق. الداعى جىلى اۋداندا بىرنەشە اۋقىمدى ينۆەستيتسيالىق جوبانى ىسكە قوسۋ جوسپارلانعان. سولاردىڭ ءبىرى – «BelAgro Group» جشس-نىڭ شارباقتى اۋىلىندا 500 گەكتار سۋارمالى القاپتى ىسكە قوسۋ جوباسى, ونىڭ ينۆەستيتسيا كولەمى – 2 ملرد تەڭگە. نازاروۆكا اۋىلىندا بىردەن 3 ينۆەستيتسيالىق جوبانى جۇزەگە اسىرۋ جوسپارلانۋدا: 600 گا سۋارمالى القاپتى ىسكە قوسۋ, 6000 تونناعا ارنالعان كوكونىس قويماسى جانە 600 باس مالعا ارنالعان تاۋارلى-ءسۇت فەرماسى.
«جاڭا جۇمىس ورىندارىنىڭ اشىلۋى جانە شاعىن بيزنەستىڭ دامۋى ناتيجەسىندە جۇمىسسىزدىق 4,1% دەڭگەيىندە ساقتالىپ وتىر, بۇل وبلىستاعى ەڭ جاقسى كورسەتكىشتەردىڭ ءبىرى», دەپ قوستى اۋدان باسشىسى.
اۋداننىڭ ءتۋريزمدى دامىتۋ ءۇشىن تابيعي الەۋەتى جوعارى. وتكەن جازدا «مارالدى» كۋرورتتىق ايماعىنا 40 مىڭنان استام ادام كەلگەن. كۋرورتتىق اۋماقتى جۇيەلى تۇردە جاڭعىرتۋعا دايىندىق جۇمىستارى باستالدى. جىل سايىن مىڭداعان ادام زيارات ەتۋگە كەلەتىن عابدۇل ۋاحيت حازىرەت كەسەنەسى ورنالاسقان «ەرتىس ورمانى» ايماعىندا ەكولوگيالىق تۋريزم, سونداي-اق ەتنوتۋريزم بەلسەندى دامىپ كەلەدى. ەندىگىسىن تۋريزمگە ينۆەستيتسيالار تارتۋ جۇمىسىن جانداندىرىپ, «قاراعاي الاڭى» قوناقۇي جوباسىن دامىتۋ كوزدەلگەن.
پاۆلودار وبلىسى,
شارباقتى اۋدانى
