فوتو: REUTERS
بۇعان دەيىن زەلەنسكي ەلدە سايلاۋ وتكىزۋگە دايىن ەكەندىگىن ايتتى. ونىڭ سوزىنشە, پرەزيدەنتتىك سايلاۋ تەك قانا اتىس توقتاعان جاعدايدا وتەدى. قاۋىپسىزدىك سايلاۋ پروتسەسىندە باستى شارت بولىپ سانالادى.
ء«بىز پرەزيدەنت ترامپپەن كەز كەلگەن فورماتتا جۇمىس ىستەۋگە دايىنبىز. ەگەر اقش پرەزيدەنتى ۋكرايناداعى سايلاۋ تۋرالى كوبىرەك ايتسا, ءبىز ونى وتكىزۋگە دايىنبىز. ۋكراينا دەموكراتيادان قاشپايدى. بىراق سايلاۋ مۇمكىن بولۋ ءۇشىن قاۋىپسىزدىك قامتاماسىز ەتىلۋى قاجەت. امەريكا بۇعان ەڭ ۇلكەن كومەك كورسەتە الادى. كەم دەگەندە سايلاۋ پروتسەسى مەن داۋىس بەرۋ كەزىندە اتىستى توقتاتۋ كەرەك. بۇل ماسەلە اق ءۇي تاراپىنان كرەملمەن تالقىلانۋى ءتيىس», دەدى زەلەنسكي.
ەسكە سالساق, ۋكرايناداعى پرەزيدەنت سايلاۋى باستاپقىدا 2024 جىلعا جوسپارلانعان ەدى. الايدا رەسەيمەن قاقتىعىسقا بايلانىستى كەيىنگە قالدىرىلدى. حالىقارالىق كەپىلدىكتەر مەن سەرىكتەستەردىڭ قولداۋىمەن سايلاۋدى ەكى-ءۇش اي ىشىندە ۇيىمداستىرۋ مۇمكىندىگى قاراستىرىلعان.
Financial Times باسىلىمىنىڭ جازۋىنشا, اقش پرەزيدەنتى دونالد ترامپ ۋكرايناداعى سوعىستى رەتتەۋ بويىنشا ىلگەرىلەۋگە قول جەتكىزۋدى كوزدەپ وتىر. ترامپتىڭ ايتۋىنشا, ۇسىنىلعان بەيبىتشىلىك جوسپارىن بارلىق تاراپتار قولدايدى.
«مەن زەلەنسكيدىڭ ءالى بەيبىتشىلىك جوسپارىن تولىق وقىماعانىنا بىراز رەنجىپ وتىرمىن. ونىڭ ادامدارى جاقسى قابىلدادى, بىراق ءوزى وقىعان جوق. رەسەي دە كەلىسىمگە دايىن دەپ ويلايمىن», دەدى ترامپ.
كرەمل كەيبىر ۇسىنىستاردى تالقىلاعانىن راستاعانىمەن, بىرقاتار پۋنكتتەر بويىنشا كەلىسپەۋشىلىكتەر بار ەكەنىن جەتكىزگەن. كيەۆ تە اپتا بويى بەيبىت كەلىسىم بويىنشا ەۋروپا سەرىكتەستەرىمەن كونسۋلتاتسيالار جۇرگىزگەن. Washington Post مالىمەتىنە سۇيەنسەك, اقش تاراپىنان جاڭارتىلعان ۇسىنىستار فرونت بويىنداعى اسكەري بەلسەندىلىكتى تومەندەتۋ شارالارىن جانە حالىقارالىق قاتىسۋدى قامتيدى. بىراق بۇل رەسمي تۇردە جاريالانعان جوق.
كەلەسى كەزەڭ – بەرليندە كەزدەسۋ, وندا زەلەنسكي اقش جانە ەۋروپا ليدەرلەرىمەن جولىقپاق. بەلگىلەنگەن مەرزىم – 14 جانە 15 جەلتوقسان. وعان اقش تاراپىنان پرەزيدەنتتىڭ ارنايى وكىلى ستيۆ ۋيتكوفف قاتىسادى دەپ كۇتىلەدى. سونىمەن قاتار كەزدەسۋگە فرانتسيا پرەزيدەنتى ەممانۋەل ماكرون, ۇلىبريتانيا پرەمەر-ءمينيسترى كير ستارمەر جانە گەرمانيا كانتسلەرى فريدريح مەرتس قاتىسادى دەپ جوسپارلانعان.
ەسكە سالايىق, زەلەنسكي ۋكراينادا سايلاۋ وتكىزۋگە دايىن ەكەنىن مالىمدەپ, اقش-تان جانە ەۋروپالىق ارىپتەستەردەن سايلاۋدى وتكىزۋ ءۇشىن قاۋىپسىزدىكتى قامتاماسىز ەتۋدى سۇراعان ەدى.
سونداي-اق بۇعان دەيىن زەلەنسكي قازاقستاندا پۋتينمەن كەزدەسۋگە دايىن ەكەنىن ايتقان.
