پاۆلودار قالاسىنداعى دارىندى بالالارعا ارنالعان №8 مەكتەپ-ليتسەيىنىڭ 11-سىنىپ وقۋشىسى اسەل ابدۋراحيموۆا ەلىمىزدەگى جاس پوليگلوتتار اراسىندا ايرىقشا تانىلعان تالانتتى قىز. ول بۇگىندە الەمنىڭ 10 ءتىلىن بىلەدى ءارى ونىڭ باسىم بولىگىن ءوز بەتىنشە مەڭگەرگەن.
شەتەل تىلدەرىنە دەگەن قىزىعۋشىلىق بالا كەزىنەن باستالىپتى. جەتى جاسىندا-اق ول الەم ەلدەرىنىڭ بارلىق استاناسىن بىلەتىن ءارى ءتۇرلى مادەنيەت وكىلدەرىمەن سويلەسۋدى ارماندايتىن.
– توعىز جاسىمدا فرانتسۋز ءتىلىن وزدىگىمنەن ۇيرەنە باستادىم. ال ون بىرگە تولعاندا پاۆلودار قالاسىنداعى العاشقى كۋرسقا باردىم. اعىلشىن ءتىلىن 2018 جىلدان بەرى وقىپ كەلەمىن. بۇل ءتىل قازىرگى ۋاقىتتا كۇندەلىكتى ءومىرىمنىڭ اجىراماس بولىگىنە اينالعان. قىتاي ءتىلىن كۋرستاردا وقىپ مەڭگەردىم. قازىر ونى جالعاستىرىپ, حالىقارالىق HSK 3 دەڭگەيى (B1) ەمتيحانىن تاپسىرۋعا دايىندالىپ ءجۇرمىن, – دەيدى اسەل.
مەملەكەتتىك ءتىل مەن انا ءتىلى – تاجىك تىلىنەن بولەك وزگە تىلدەردى, اتاپ ايتقاندا وزبەك, ورىس, يسپان, يتاليان, جاپون (N4) تىلدەرىن الەم مادەنيەتتەرىنە دەگەن قىزىعۋشىلىعى مەن ءتۇرلى حالىقتى تۇسىنۋگە دەگەن ۇمتىلىسىنىڭ ارقاسىندا تولىقتاي ءوز بەتىنشە مەڭگەرگەن. ول بۇل تىلدەردىڭ بارلىعىندا ەركىن سويلەيتىن دارەجەگە جەتىپ وتىر.
«مەن ءاردايىم ساياحاتتاپ, ءتۇرلى ەلدىڭ ادامدارىمەن ەركىن سويلەسۋدى ارماندايتىنمىن. كەلەسى ماقساتىم – اراب ءتىلىن ۇيرەنىپ, بۇۇ-نىڭ التى رەسمي ءتىلىن تولىق مەڭگەرۋ. بۇل العا ۇمتىلدىراتىن جانە جاڭا كوكجيەكتەردى اشۋعا شابىتتاندىراتىن ارمان», دەيدى ول.
مەكتەپ اكىمشىلىگى اسەل وقۋشىلار اراسىندا ەڭبەكقورلىعىمەن, تاربيەسىمەن وزگەلەرگە ۇلگى ەكەنىن اتاپ ءوتتى. ونىڭ جەتىستىكتەرى قۇربى-قۇرداستارىن ىنتالاندىرىپ, بىلىمگە دەگەن تالپىنىس پەن تاباندىلىق وراسان ناتيجەلەرگە جەتكىزەتىنىن دالەلدەپ وتىر.
پاۆلودار
