قازىردە وبلىستا ورفان اۋرۋلارىنا شالدىققان 1 472 ادام ەسەپتە تۇر, ونىڭ ىشىندە 390-ى – بالالار. تەك بيىل جاڭادان 233 ادامدا اتالعان دەرت انىقتالعان, ونىڭ ىشىندە التاۋى بالا. ايتا كەتەلىك, ورفاندىق اۋرۋلار دەگەنىمىز – وتە سيرەك كەزدەسەتىن, كوبىنەسە گەنەتيكالىق نەگىزدە تۋىندايتىن, ومىرگە قاۋىپتى نەمەسە مۇگەدەكتىككە اكەلەتىن اۋرۋلار توبى.
– بۇگىندە امبۋلاتوريالىق پاتسيەنتتەرگە كەپىلدەندىرىلگەن تەگىن مەديتسينالىق كومەكتىڭ كولەمى, مىندەتتى الەۋمەتتىك مەديتسينالىق ساقتاندىرۋ اياسىندا ءوڭىر تۇرعىندارى جالپى سوماسى 12,9 ملرد تەڭگەگە دارىلىك زاتتارمەن قامتاماسىز ەتىلگەن. ونىڭ ىشىندە ورفاندىق پاتسيەنتتەرگە 3 ملرد تەڭگەدەن استام قاراجات باعىتتالعان, – دەيدى وڭىرلىك دەنساۋلىق ساقتاۋ باسقارماسى باسشىسىنىڭ ورىنباسارى ايگۇل مۇقىشەۆا.
2026 جىلعا دارىلىك قامتاماسىز ەتۋگە, ونىڭ ىشىندە ورفاندىق پاتسيەنتتەرگە ارنالعان الدىن الا بيۋدجەتتىك ءوتىنىم سوماسى 16,4 ملرد تەڭگەنى قۇراپ وتىر. سونىڭ ىشىندە تەك قانا 24 ورفاندىق پاتسيەنتتى (ديۋشەنن بۇلشىق ەت ديستروفياسى, ج ۇلىن بۇلشىق ەت اتروفياسى, نەيروفيبروماتوز, مۋكوۆيستسيدوز, ونكوگەماتولوگيالىق اۋرۋلار) پرەپاراتپەن قامتاماسىز ەتۋگە 2,3 ملرد تەڭگە كولەمىندە بيۋدجەتكە قوسىمشا ءوتىنىم جولدانعان.
– ورفاندىق اۋرۋلارعا ارنالعان ءدارى-دارمەك باعاسى وتە قىمبات تۇرادى. ءبىر دارىلىك پرەپاراتتىڭ ورتاشا قۇنى 100 مىڭ تەڭگەدەن 2 ملن تەڭگەگە دەيىن جەتەدى. ەڭ قىمباتى – «سپينرازا» (نۋسينەرسەن) پرەپاراتى, ءبىر پاتسيەنت ءۇشىن جىلدىق قۇنى 90 ملن تەڭگەدەن اسادى. ول رەسپۋبليكالىق بيۋدجەت ەسەبىنەن ساتىپ الىناتىنىن ەسكەرۋ كەرەك. ەلىمىزدەگى امبۋلاتوريالىق تەگىن دارىلىك قامتاماسىز ەتۋ تىزبەسىنە سايكەس 40-تان استام ورفاندىق اۋرۋعا شامامەن 96 اتاۋلى دارىلىك زات قاراستىرىلعان. بۇلار جۇيەلى قىزىل جەگى, يۋۆەنيلدى ارتريت, كوپتىك ميەلوما, كيستوزدى فيبروز (مۋكوۆيستسيدوز), مياستەنيا, ج ۇلىن بۇلشىق ەت اتروفياسى, كوپتىك ميەلوما, تاعى باسقا دا اۋرۋلارعا ارنالعان, – دەپ قوستى باسقارما وكىلى.
مەديتسينالىق ۇيىمدار ديسپانسەرلىك ەسەپتە تۇرعان پاتسيەنتتەر جونىندەگى قاجەتتىلىكتى ءوز بەتىنشە قالىپتاستىرىپ, «سق-فارماتسيا» جشس ونى جاسالعان شارتتار مەن بەكىتىلگەن كەستەلەرگە جەتكىزىپ بەرەدى. پرەپاراتتار نەگىزىنەن گەرمانيا, فرانتسيا, اقش, شۆەيتساريا, جاپونيا ەلدەرىندە شىعارىلادى.
مامانداردىڭ ايتۋىنشا, ورفاندىق, ياعني سيرەك اۋرۋلاردا ادامنىڭ ورتاشا ءومىر ءسۇرۋ ۇزاقتىعىن شامالاپ كورسەتۋ مۇمكىن ەمەس. سەبەبى بۇل اۋرۋلاردىڭ ىشكى ءبولىنىسى الۋان ءتۇرلى. بەلگىلى ءبىر اۋرۋدىڭ بولجامى ونىڭ تۇرىنە, گەنەتيكالىق مۋتاتسياسىنا, اۋىرلىق دارەجەسىنە, ەمنىڭ قولجەتىمدىلىگىنە, تەراپيانىڭ باستالۋ ۋاقىتىنا بايلانىستى.
دەنساۋلىق ساقتاۋ باسقارماسىنىڭ وكىلى قازىرگى ۋاقىتتا جەرگىلىكتى مەديتسينالىق ۇيىمداردا جىل سوڭىنا دەيىن تاپشىلىق قاۋپى بار پرەپاراتتارعا قاتىستى قوسىمشا ءوتىنىم قالىپتاستىرىلعانىن دا اتاپ ءوتتى. ولار
«سق-فارماتسيا» جشس ارقىلى ساتىپ الىنىپ جاتىر.
پاۆلودار وبلىسى
