جازۋشىلار وداعى ۇيىتقى بولعان بۇل ءىس-شاراعا ەلدىڭ رۋحاني ورتاسىندا جۇرگەن زيالى قاۋىم وكىلدەرى مەن شاكىرتتەرى, تۋعان تۋىستارى مەن ستۋدەنتتەر قاتىستى.
ءىس-شاراعا جينالعان قالامگەرلەر ەرەكشە مىنەزدى اقىن-مايدانگەر تۋرالى ەستەلىكتەرىن ايتىپ, ەمەن-جارقىن اڭگىمەنىڭ تيەگىن اعىتتى. كىتاپحانا قورى ۇيىمداستىرعان كورمەنى تاماشالادى.
كەش تىزگىنىن جازۋشىلار وداعى باسقارماسىنىڭ حاتشىسى, پروفەسسور قانسەيىت ابدەز ۇلى الىپ, باس باياندامانى اقىن بولات شاراحىمباي جاسادى.
ول بۇگىنگى مەرەيتوي يەسىنىڭ ءومىر جولى مەن شىعارماشىلىعى جايىندا كەڭىنەن تولعاي كەلىپ, توقاش بەردياروۆ تۇلعاسىنا ەرەكشە توقتالدى.
«توقاش بەردياروۆ – ادەبيەتكە وتكەن عاسىردىڭ بەل ورتاسىندا كەلگەن. سوعىس كورگەن اعا بۋىننىڭ قاتارىنا جاتادى. ول ادەبيەتكە جاي كەلمەي, پوەزياعا وزىندىك ورنەگىن سالا كەلگەن سىرشىل, سىنشىل, شىنشىل اقىنداردىڭ ءبىرى بولىپ قوسىلدى. اشىعىن ايتساق, توقاش بەردياروۆ وتكەن عاسىردىڭ 50-80 جىلدار ارالىعىنداعى اتاعى مەن شاتاعى قاتار شىققان ەڭ داڭقتى اقىن. كوپتەگەن ءىزباسار اقىن توقاشتىڭ جانىندا جۇرگەندى, ۇستەل باسىندا ونىمەن بىرگە وتىرعاندى ۇلكەن دارەجە سانايتىن. وسى كەزەڭدە اتى شىققان مۇقاعالي ماقاتاەۆ, قادىر مىرزا ءالى, تولەگەن ايبەرگەنوۆ, وتەجان نۇرعاليەۆ, ەسەنعالي راۋشانوۆ, امانحان ءالىم, قاسىمحان بەگمانوۆ, تاعى باسقا سياقتى تەگەۋرىندى اقىنداردىڭ ءبارى توقاشتى ۇستاز تۇتقان, ونىڭ شىعارماشىلىعىنان كوپ ۇيرەنگەن. توقاش – ءبىر ءوڭىردىڭ, نە ءبىر ايماقتىڭ عانا اقىنى ەمەس, ول قارا ورمان بۇكىل قازاق حالقىنىڭ اقىنى. سوندىقتان ەل باسىندا جۇرگەن اكىم-قارالار وسى جونىندە مىقتاپ ويلانعاندارى ءجون دەمەكپىن, دەدى بايانداماشى ءوز سوزىندە. سونداي-اق, بايانداماشى كىتاپتىڭ ەرەكشەلىكتەرىنە قاتىستى وي ءوربىتىپ, جيناققا زاڭعار جازۋشى مۇحتار اۋەزوۆتەن باستاپ 50-دەن استام اۆتوردىڭ ەستەلىكتەرى مەن زەرتتەۋلەرى توپتاستىرىلعانىن اتاپ ءوتتى.
كەش بارىسىندا بەلگىلى قالامگەرلەر مارات توقاشباەۆ, جۇماش كەنەباي, مىرزان كەنجەباي, ەلدوس توقتارباي, الىبەك بايبول, قانات التىنبەك, قازاقتىڭ مۇزبالاق اقىنى مۇقاعاليدىڭ ۇلى جۇلدىز ماقاتاەۆ, بەلگىلى فارابيتانۋشى عالىم جاقىپبەك التاەۆ, دارىگەر-پروفەسسور ساۋىربەك رۋزيددينوۆ, ورتالىق مەملەكەتتىك ارحيۆ ديرەكتورى, تاريحشى-عالىم ءسابيت شىلدەباي ءسوز سويلەپ, كىتاپ جايىندا لەبىزىن ءبىلدىردى.
ءىس-شاراعا توقاڭنىڭ تۋعان جەرىنەن ارنايى ات باسىن بۇرىپ كەلگەن قوناقتار «تاعدىرلى دارىن» كىتابىنىڭ قۇراستىرۋشىسى ءارى توقاش اقىننىڭ ىزدەۋشىسى اقىن بولات شاراحىمبايعا اۋدان اكىمى اتىنان العىس ايتىپ, قۇرمەتتەرىن كورسەتتى.
كىتاپحانادا وتكەن بۇل باسقوسۋ ازۋلى اقىن توقاش بەردياروۆ شاكىرتتەرىنىڭ باسى قوسىلىپ, ۇستازدارىن دارىپتەپ, اقىننىڭ ارتىندا قالعان مۇراسىن ەل رۋحانياتىنداعى ورنى مەن ميسسياسىن تاعى ءبىر مارتە ايعاقتايتىن ەرەكشە كەش رەتىندە ەستە قالدى.
