شاعىن دۇكەننىڭ تاۋەلسىزدىككە شاشۋى

كاسىپكەردىڭ ايتۋىنشا, بەزەندىرۋدەن كەيىن استانانىڭ ءار اۋدانىنان تۇرعىندار ارنايى كەلىپ, دۇكەندى كورىپ, سۋرەتكە ءتۇسىپ, ساۋدا جاساپ, جىلى لە­بىز­دەرىن ءبىلدىرىپ جاتقان كورىنەدى.

«اينالاداعى دۇكەندەردى قاراسام, كوبىسىندە شىرشا قويىلىپ, جاڭا جىلعا دايىندىق قىزىپ جاتىر ەكەن. ارينە, بۇل دا جاقسى مەرەكە. بىراق 16 جەلتوقسان – ءبىزدىڭ ازاتتىق العان كۇنىمىز. نەگە ءدال وسى مەرەكەدە دە مەكەمەلەردى جارقىراتىپ قويماسقا دەپ ويلادىم. ەڭ باستىسى, وسىناۋ ايتۋلى داتا ەسكەرۋسىز قالماسىن, بالالار دا, ەرەسەكتەر دە دۇكەنگە كىرگەندە كوك تۋدى كورىپ, وسى كۇننىڭ ءمانىن سەزىنسە دەيمىن. بۇگىن تاعى ءبىر قۋانىش – ۇلدى بولدىم. سوندىقتان ءدال وسى مەيرام ماعان وتە ىستىق. ءبىزدىڭ دۇكەندەگى مەرەكەلىك بەزەندىرۋ ازات كۇنىمىزگە دەگەن كىشكەنتاي العىس قانا», دەيدى كاسىپكەر.

تەمىرحاننىڭ يدەياسىن ىسكە اسىرۋ وڭاي بولماعان. دۇكەن ءىشىن 7 كۇندە بەزەندىرىپ, جالپى 4000 دانا شار مەن 1000-عا جۋىق جالاۋ ساتىپ الىنعان. شامامەن 2 ملن تەڭگە جۇمسالعانىمەن, حالىقتىڭ قولداۋى مەن ارتقان ساۋ­دا شى­عىندى تولىق اقتاعان. ءبىر قاراعاندا ۇساق-تۇيەك بولىپ كورىنگەن دەتالداردىڭ ءبارى بىرىككەندە, ەرەكشە اتموسفەرا سىيلايدى. دۇكەن تاۋلىك بويى, 24/7 رەجىمىندە جۇمىس ىستەيدى.

جاڭا جىل جاقىنداعان سايىن, ادەمى شىرشا, ءتۇرلى-ءتۇستى شامدار, سىرتقى بەزەندىرۋلەر كوبەيەتىنى راس. ال تاۋەلسىزدىك كۇنى كوبىنە رەسمي شارالار, سالتاناتتى جيىندار اياسىندا عانا اتاپ وتىلەدى. «ازىرەت» دۇكەنىنىڭ وسى ءبىر باستاماسى – ۇلتتىق مەرەكەنى كۇندەلىكتى ءومىر كەڭىستىگىنە اكەلۋدىڭ, قا­راپايىم تۇرمىستىق ورتادا ناسي­حاتتاۋدىڭ جارقىن مىسالى.