كوماندالىق كوكپار ليگاسى – ءداستۇرلى ۇلتتىق ويىن كوكپاردىڭ كاسىبي سپورت تالاپتارىنا بەيىمدەلگەن زاماناۋي سپورتتىق فورماتى. جارىستار ەكى كوماندا اراسىندا وتەدى جانە ويىننىڭ بەلگىلەنگەن ۋاقىتى, تورەشىلىك, ايىپ جۇيەسى مەن اۋىسىمداردى قامتيتىن بىرىڭعاي ەرەجەلەر بويىنشا جۇرگىزىلەدى.
ءداستۇرلى كوكپاردان ايىرماشىلىعى – كوماندالىق ليگا ويىندى اناعۇرلىم ديناميكالىق ءارى تاكتيكالىق تۇرعىدا جيناقى وتەدى. كوماندالاردىڭ ناقتى قۇرامى, باپكەرلەرى مەن ماتچ جۇرگىزۋ ستراتەگياسى بولادى, بۇل ويىننىڭ كورنەكىلىگىن ارتتىرىپ, سپورتشىلاردىڭ دايىندىق دەڭگەيىن كۇشەيتەدى.
كوماندالىق كوكپار ليگاسى اۋداندىق, وڭىرلىك جانە وبلىستىق دەڭگەيلەردە دامىپ, ۇلتتىق ات سپورتىنىڭ تانىمال بولۋىنا جانە قازاقستاننىڭ مادەني مۇراسىن نىعايتۋعا ىقپال ەتەدى.
«كوماندالىق كوكپار ليگاسى – ۇلتتىق ات سپورتى تۇرلەرىن دامىتۋعا باعىتتالعان ماڭىزدى جوبا. جالپى, وبلىس əكىمدىگىنىڭ قولداۋى ءىرى جارىستار وتكىزىپ قانا قويماي, ينفراقۇرىلىمدى دامىتۋعا, سەكتسيالار اشۋعا, جاستاردى تارتۋعا مۇمكىندىك بەرەدى», دەپ اتاپ ءوتتى الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى اقجۇرەك تاناتاروۆ.
وبلىستىق ليگانىڭ فينالدىق كەزەڭى ۇلتتىق سپورتتىڭ ناعىز مەرەكەسىنە اينالدى. چەمپيون اتاعى ءۇشىن «باتىس ءوڭىرى» اتىنان قاراساي اۋدانى, جامبىل اۋدانى جانە كەمەرتوگان (قاراساي اۋدانى) اۋىلدارىنىڭ قۇرامالارى, ال «شىعىس وڭىرىنەن» كەگەن اۋدانى, ەڭبەكشىقازاق اۋدانى جانە بولەكساز (كەگەن اۋدانى) اۋىلدارىنىڭ ۇزدىك كوماندالارى باق سىنادى. تاڭسارىدەن باستاپ دەمالىس ورتالىعىنىڭ اۋماعىندا ەرەكشە اتموسفەرا ورنادى – ونداعان جانكۇيەر ءوز كوماندالارىن قولداۋ ءۇشىن جينالدى. كوكپار الاڭى بارلىق تالاپتارعا ساي دايىندالىپ, تورەشىلەر القاسى ءار كەزدەسۋدىڭ اشىقتىعى مەن ءادىل قاداعالاۋىنا ءمان بەردى.
ء«ار كوماندا الاڭعا ماكسيمالدى دايىندىقپەن شىقتى. فينالدىق كەزەڭ سپورتشىلارىمىزدىڭ جوعارى دەڭگەيىن كورسەتتى. كوكپارشىلار ناعىز ەرلەرگە ءتان تارتىستى ويىن, كەرەمەت تەحنيكا جانە جەڭىسكە دەگەن جىگەر تانىتتى. قۋانتاتىنى – كوكپارعا دەگەن قىزىعۋشىلىق جىل سايىن ارتىپ, تۋرنيرلەردىڭ كاسىبيلىگى جوعارىلاپ كەلەدى», دەدى جارىستىڭ باس تورەشىسى سابيت قاسەنوۆ.
ماتچتار اينالمالى جۇيەدە ءوتتى, وندا ءار كوماندا وزدەرىنىڭ تاكتيكالىق شەبەرلىگىن, جىلدامدىعى مەن كۇشىن كورسەتۋ مۇمكىندىگىنە يە بولدى. اسىرەسە, شەشۋشى فينالعا شىعۋ تاعدىرىن ايقىنداعان قاتار ماتچتار وتە تارتىستى ءوتتى.
ويىن الاڭىنىڭ ءار مەترى ءۇشىن كۇرەس ءجۇرىپ, ويىننىڭ قارقىنى كورەرمەندەردى سوڭعى مينۋتقا دەيىن تولقۋ ۇستىندە ۇستادى.
ناتيجەسىندە ورىندار تومەندەگىدەي ءبولىندى:
1 ورىن – جامبىل اۋدانىنىڭ كومانداسى;
2 ورىن – بولەكساز اۋىلىنىڭ كومانداسى (كەگەن اۋدانى);
3 ورىن – قاراساي اۋدانىنىڭ قۇراماسى.
«بۇل فينالعا ۇزاق دايىندالدىق. قارسىلاستار وتە كۇشتى بولدى, ءار ويىن وڭايعا تۇسكەن جوق. جەڭىس – بۇكىل كوماندانىڭ, شاباندوزدار مەن باپكەرلىك شتابتىڭ تىنىمسىز ەڭبەگىنىڭ ناتيجەسى. جانكۇيەرلەرگە قولداۋى ءۇشىن العىس ايتامىز – ول بىزگە كۇش بەردى», دەدى جامبىل اۋدانى كومانداسىنىڭ مۇشەسى تلەشباەۆ اقىلجان.
جۇلدەلى ورىن العان كوماندالار گراموتالارمەن, مەدالدارمەن, كۋبوكتارمەن جانە اقشالاي سىيلىقتارمەن ماراپاتتالدى. سونداي-اق التى ءتۇرلى نوميناتسيا بويىنشا جەڭىمپاز اتانعان ويىنشىلارعا دا سىيلىقتار تاپسىرىلدى.
ۇيىمداستىرۋشىلار – الماتى وبلىسىنىڭ دەنە شىنىقتىرۋ جانە سپورت باسقارماسى جانە وبلىستىق «ۇلتتىق سپورت تۇرلەرى بويىنشا درس» – كەلەسى جىلى ليگا فورماتتى كەڭەيتۋدى جانە قاتىسۋشىلار سانىن ارتتىرۋدى جوسپارلاپ وتىرعاندارىن ايتتى.
