فوتو: Tengrinews.kz
ۋاقىت نورماسىن ءار ءوڭىردىڭ جەرگىلىكتى اتقارۋشى ورگاندارى – وبلىس, رەسپۋبليكالىق ماڭىزى بار قالا جانە استانا اكىمدىكتەرى جەكە ايقىندايتىن بولادى.
تىيىم ەلەكتروموبيلدەرگە, سونداي-اق ارنايى جارىق جانە دىبىس سيگنالدارى بار قىزمەت كولىكتەرىنە قولدانىلمايدى.
دەپۋتاتتاردىڭ ايتۋىنشا, بۇل شەشىم بىرنەشە قىس بويى تالقىلانىپ كەلگەن «اۋلا ىشىندە اۆتوكولىكتى قانشا مينۋت قىزدىرۋعا بولادى؟» دەگەن سۇراققا جەرگىلىكتى دەڭگەيدە جاۋاپ بەرۋ ءۇشىن قابىلدانىپ وتىر. بۇل ءتيىمدى ءتاسىل, ويتكەنى ەلدىڭ ءار وڭىرىندەگى كليمات پەن ەكولوگيالىق جاعداي ءارتۇرلى, ال بىرىڭعاي نورمانى ەنگىزۋ قيىن. ونىڭ ۇستىنە قاجەت بولعان جاعدايدا جەرگىلىكتى ەرەجەلەردى وزگەرتۋ زاڭعا قايتا تۇزەتۋ ەنگىزگەننەن جەڭىلىرەك.
سونداي-اق وسى تۇزەتۋلەر اياسىندا اقىلى كوممۋنالدىق اۆتوتۇراقتارعا تەك استانا مەن الماتىدا عانا رۇقسات بەرۋ ۇسىنىلادى. «جول ءجۇرۋ تۋرالى» زاڭنان «رەسپۋبليكالىق ماڭىزى بار قالالار» تۋرالى نورما الىنىپ تاستالادى. اقىلى تۇراق ءۇشىن تولەم جاساماۋ فاكتىلەرى بويىنشا ايىپپۇل دا تەك وسى ەكى قالادا عانا قاراستىرىلادى. بۇل ءۇشىن اكىمشىلىك كودەكسكە وزگەرىس ەنگىزۋ جوسپارلانعان.
قۇجات سەناتقا جولدانىپ, ودان كەيىن پرەزيدەنتتىڭ قاراۋىنا جىبەرىلەدى. تۇزەتۋلەر قابىلدانىپ, رەسمي جاريالانعان سوڭ التى اي وتكەننەن كەيىن كۇشىنە ەنەدى. دەمەك, بيىلعى قىستا اۆتوكولىكتى قىزدىرۋ ماسەلەسى بۇرىنعى قولدانىستاعى ەرەجەلەرمەن رەتتەلەدى.
