بايقاۋدىڭ باستى ماقساتى – شىعۋ تەگى تۋرالى قۇجاتسىز جۇرگەن اسىل تۇقىمدى تازىلاردى انىقتاپ, ولاردى رەسمي ەسەپكە الۋ جانە قۇجاتتاندىرۋ.
ەكستەرەردى باعالاۋ جانە تولىق سيپاتتاما بەرۋ جۇمىستارىن ساراپشىلار انەل بولگۋمباەۆا مەن ناتاليا دروۆوسەكوۆا جۇرگىزدى. ولار يتتەردى بەكىتىلگەن تۇقىمدىق ستاندارتقا سايكەس باعالاپ, قاجەتتى ولشەمدەردى الدى, ءتىس فورمۋلالارىن تەكسەردى, اناتوميالىق قۇرىلىمىن جانە قوزعالىس ەرەكشەلىكتەرىن سارالادى. سونىمەن قاتار سايكەستەندىرۋ قۇرالدارىن ورناتتى (چيپتەۋ).
ساراپتاما ناتيجەسىنە سايكەس, 43 ءيتتىڭ 14-ءى «وتە جاقسى» دەگەن باعا الىپ, ءارى قاراي تۇقىمدىق وسىرۋگە رۇقسات الدى. قالعان يتتەر ستاندارتتارعا تولىق سايكەس كەلمەگەندىكتەن, سەلەكتسيالىق جۇمىسقا جىبەرىلمەيدى.
ۇيىمداستىرۋشىلاردىڭ ايتۋىنشا, مۇنداي قاتاڭ سەلەكتسيالىق باعالاۋ قازاقى تازى تۇقىمىنىڭ ساپاسى مەن گەنەتيكالىق تازالىعىن ارتتىرۋعا باعىتتالعان.
بايقاۋ الاڭىندا ۇلتتىق ناقىشتا بەزەندىرىلگەن كيىز ءۇي فوتوايماق رەتىندە ۇيىمداستىرىلىپ, قاتىسۋشىلارعا ءوز تازىلارىمەن ەستەلىك سۋرەتكە ءتۇسۋ مۇمكىندىگى بەرىلدى. بۇل شارا قازاقى تازىنىڭ ۇلتتىق قازىنا رەتىندەگى مارتەبەسىن ەرەكشە ايشىقتادى.
