فوتو: استانا اكىمدىگى
اتالعان ءىس-شارانى استانا قالاسى پروكۋراتۋراسى, قالا اكىمدىگى, قىلمىستىق-اتقارۋ جۇيەسى دەپارتامەنتى بىرلەسىپ ۇيىمداستىرعان.
«بۇگىن ءبىز «زاڭ جانە ءتارتىپ» تۇجىرىمداماسى اياسىندا ماڭىزدى الەۋمەتتىك اكتسيا وتكىزىپ وتىرمىز. ءبىزدىڭ ورتاق ماقساتىمىز – ەسەپتە تۇرعان ازاماتتارعا ناقتى قولداۋ كورسەتىپ, ولاردىڭ زاڭعا باعىناتىن ءارى تۇراقتى ومىرگە قايتا ورالۋىنا جاعداي جاساۋ. جۇمىسپەن قامتىلعان ازاماتتار قايتا قۇقىق بۇزۋشىلىق ارەكەتتەرگە بارماسى انىق. سوندىقتان بۇگىن ءبىر الاڭدا بيزنەس وكىلدەرى مەن جۇمىسپەن قامتۋ قىزمەتى جينالىپ, جۇمىس ورىندارىن, تەگىن وقىتۋ مۇمكىندىكتەرىن جانە كاسىبي كەڭەستەر ۇسىنۋعا دايىن. ءاربىر قاتىسۋشىعا ءوز تاعدىرىن وزگەرتۋگە مۇمكىندىك بەرىلىپ وتىر. سونداي-اق قارجىلىق ماسەلەلەر مەن نەسيەلىك جۇكتەمەسىنە ەرەكشە كوڭىل بولىنۋدە. زاڭگەرلەر مەن سوت ورىنداۋشىلار ازاماتتارعا بەرەشەكتەرىن رەتتەۋگە جانە كۇردەلى جاعدايلاردى زاڭدى جولمەن شەشۋگە كومەكتەسەدى. سونىمەن قاتار مەديتسينالىق بلوك جۇمىس ىستەپ تۇر. مۇندا قاتىسۋشىلار قاجەتتى كەڭەس الادى. بۇدان بولەك ەلەكتروندىق ۇكىمەت پورتالىندا تىركەلۋ جانە مەملەكەتتىك قىزمەتتەردى, ونىڭ ىشىندە قۇجاتتاندىرۋ ماسەلەسى بويىنشا قىزمەتتەردى حقكو-عا بارماي-اق الۋ مۇمكىندىگى دە قامتاماسىز ەتىلگەن», دەدى استانا قالاسى پروكۋراتۋراسى باسقارماسىنىڭ اعا پروكۋرورى نۇرتاس دۇيسەمباەۆ.
ونىڭ ايتۋىنشا, اتالعان اكتسياعا 200-گە جۋىق ادام قاتىسادى دەپ جوسپارلانىپ وتىر.
«بۇل اكتسيا پروكۋراتۋرامەن مەملەكەتتىك ورگاندار جۇرگىزىپ وتىرعان جۇيەلى جۇمىستىڭ ءبىر بولىگى. ءبىز «زاڭ جانە ءتارتىپ» ءار ازاماتتان باستالاتىنىنا سەنەمىز. ال ءبىزدىڭ مىندەت - ادامنىڭ جاڭا بولاشاققا نىق قادام جاساۋىنا مۇمكىندىك بەرەتىن جاعداي جاساۋ», دەدى اعا پروكۋرور.
پروكۋراتۋرا وكىلىنىڭ ايتۋىنشا, قازىرگى تاڭدا استانادا 2500-دەن استام ادام پروباتسيا قىزمەتىندە ەسەپتە تۇر. ولاردىڭ كوپشىلىگى - 25-35 جاس ارالىعىنداعى ازاماتتار.
«بۇگىنگى الەۋمەتتىك اكتسياعا 25 جۇمىس بەرۋشى قاتىسىپ جاتىر. ولار 300-گە جۋىق بوس جۇمىس ورنىن ۇسىنىپ وتىر. ولاردىڭ قاتارىندا سانتەحنيك, تىگىنشى, ەلەكتريك سەكىلدى جانە ت.ب. جۇمىستار بار», دەدى استانا قالاسى اكىمدىگى ەڭبەك موبيلدىلىگى ورتالىعىنىڭ ديرەكتورى ولجاس ومار.
