فوتو: اشىق دەرەككوز
مينيسترلىكتىڭ حابارلاماسىندا جازىلعانداي, 2023–2029 جىلدارعا ارنالعان قازاقستان رەسپۋبليكاسىنداعى جوعارى ءبىلىم مەن عىلىمدى دامىتۋ تۇجىرىمداماسىندا ۇبت فورماتىن حالىقارالىق ستاندارتتالعان فورماتقا كوشىرۋ, تەست تاپسىرمالارىن قۇرۋ جانە ناتيجەلەردى تالداۋدا پسيحومەتريالىق تاسىلدەردى قولدانۋ ارقىلى جەتىلدىرۋ قاراستىرىلعان. وسى شارالاردى ىسكە اسىرۋ ماقساتىندا ETS (Educational Testing Service) جەتەكشى حالىقارالىق ۇيىمىمەن ىنتىماقتاستىق ورناتۋ ماسەلەسى پىسىقتالدى. ايتا كەتەيىك, ETS (Educational Testing Service) – TOEFL جانە GRE سياقتى حالىقارالىق ەمتيحانداردى ازىرلەيتىن جەتەكشى حالىقارالىق ۇيىم.
وسى جىلدىڭ 21 قىركۇيەگىندە مەملەكەت باسشىسىنىڭ اقش-قا ساپارى بارىسىندا ETS كومپانياسىنىڭ باس ديرەكتورى اميت سەۆاكپەن كەزدەسۋ ءوتتى, وندا ۇلتتىق ءبىلىم جۇيەسىن جەتىلدىرۋ ماسەلەلەرى تالقىلاندى. قورىتىندىسىندا كەلەسى شارالار قابىلداندى:
بىرىنشىدەن: تەستىلەۋ سالاسىنداعى ETS حالىقارالىق جەتەكشى ساراپشىلارىنىڭ قاتىسۋىمەن جۇمىس توبى قۇرىلدى.
ەكىنشىدەن: وسى جىلدىڭ 31 قازانىندا استانادا ستراتەگيالىق سەرىكتەستىكتەر فورۋمىندا ETS باس ديرەكتورى اميت سەۆاكتىڭ قاتىسۋىمەن ءارى ىنتىماقتاستىقتى ودان ءارى دامىتۋ ماسەلەلەرى تالقىلاندى.
ۇشىنشىدەن: وسى جىلدىڭ 6 قاراشاسىندا عجبم, ۇتو جانە ETS اراسىندا ءوزارا تۇسىنىستىك مەموراندۋمىنا قول قويىلدى (ۆاشينگتون, اقش).
تورتىنشىدەن: جوعارى ساپالى تەست تاپسىرمالارىن ازىرلەۋدى قامتاماسىز ەتۋ ماقساتىندا 30 قىزمەتكەردى حالىقارالىق «بولاشاق» ستيپەندياسى شەڭبەرىندە وقىتۋ ماسەلەسى پىسىقتالدى.
بەسىنشىدەن: ETS-پەن بىرلەسىپ جاساندى ينتەللەكت, ءاداپتيۆتى تەستىلەۋ جانە حالىقارالىق ستاندارتتاردى قولداناتىن جاڭا تەست قۇرۋ تاسىلدەرى انىقتالدى.
«جاڭا تەستىلەۋ قاناتقاقتى رەجىمدە قازاقستانداعى شەتەلدىك ۋنيۆەرسيتەتتەردىڭ فيليالدارىنا ءتۇسۋ كەزىندە ەنگىزۋ جوسپارلانىپ جاتىر. جالپى جاڭا تەستىلەۋ فورماتى ۇبت ساپاسىن ارتتىرىپ, ونى ەڭ ۇزدىك الەمدىك تاجىريبەلەرگە سايكەس ستاندارتتالعان كىرىسپە ەمتيحان رەتىندە تانىلۋىن قامتاماسىز ەتەدى. ايتا كەتۋ كەرەك, 2026 جىلى قازىرگى ۇبت فورماتى وزگەرمەيدى, جاڭا تەست فورماتىن كەزەڭ-كەزەڭىمەن ەنگىزۋ 2027 جىلدان باستالادى», دەلىنگەن حابارلامادا.
