فوتو: دەنساۋلىق ساقتاۋ مينيسترلىگى
ءبىراۋىزدى شەشىم ءۇش ءتۇرلى نوزولوگياداعى پاتسيەنتتەرگە قاتىستى قابىلداندى. ورفاندىق كەسەلگە دۋشار بولعانداردى قارجىلاندىرۋعا جالپى سوماسى 128 ملن تەڭگە قاجەت. قوعامدىق دەنساۋلىق ساقتاۋ باسقارماسى ۇسىنعان نوزولوگيالار الەۋمەتتىك ماڭىزى جوعارى, كەي جاعدايلاردا سيرەك ءارى اۋىر دەرتتەردىڭ ساناتىنا جاتادى.
جەرگىلىكتى بيۋدجەت ەسەبىنەن امبۋلاتوريالىق دەڭگەيدە دارىلىك پرەپاراتتار جۇيەلى قىزىل جەگى, قىسقا ىشەك سيندرومى مەن وپتيكوميەلونەۆريت (دەۆيك اۋرۋى) دياگنوزى بار پاتسيەنتتەرگە جەتكىزىلەدى.
«مۇنداي كەسەلگە دۋشار بولعان ناۋقاستار ءۇشىن زاماناۋي پرەپاراتتاردى قولدانۋ – جاي عانا مەديتسينالىق قاجەتتىلىك ەمەس, اۋرۋدى تۇراقتاندىرۋدىڭ, ەڭبەككە قابىلەتتىلىكتى ساقتاۋدىڭ جانە مۇگەدەكتىككە جول بەرمەۋدىڭ جالعىز جولى.
ۇسىنىلعان ءاربىر ماسەلە – ءوڭىر تۇرعىندارىنىڭ ناقتى قاجەتتىلىگىنە نەگىزدەلگەن. ءار ساننىڭ ارتىندا اۋىر جاعدايعا تاپ بولىپ وتىرعان ادامدار مەن ولاردىڭ وتباسىلارى تۇر», دەدى الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءلايلا يمانعاليەۆا.
ورايى كەلىپ تۇرعاندا, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە سايكەس, 2017 جىلدان بەرى ورفاندىق اۋرۋلارىمەن اۋىراتىن پاتسيەنتتەر قىمبات دارىلىك پرەپاراتتارمەن نەگىزىنەن ءماسليحاتتاردىڭ شەشىمى بويىنشا جەرگىلىكتى بيۋدجەت ەسەبىنەن قامتاماسىز ەتىلەتىنىن ايتا كەتۋ كەرەك.
