فوتو: kazakhmys.kz
ۇلتتىق ستاتيستيكا بيۋروسىنىڭ دەرەكتەرى بويىنشا وتكەن جىلى قايتا دايارلانعان نەمەسە بىلىكتىلىگىن ارتتىرعان قىزمەتكەرلەر سانى 577,9 مىڭ ادامدى قۇرادى. بۇل 2023 جىلمەن سالىستىرعاندا شامامەن 2%-عا از.
ايماقتىق كورسەتكىشتەرگە سۇيەنسەك, قايتا دايارلاۋ كۋرستارىنان وتكەن ازاماتتاردىڭ كوپشىلىگى ونەركاسىپ دامىعان وڭىرلەردە تۇرادى. وتكەن جىلى جۇمىس بەرۋشى ەسەبىنەن قايتا دايارلانعان مامانداردىڭ ەڭ كوپ سانى پاۆلودار وبلىسىندا تىركەلدى – 84,1 مىڭ ادام. ودان كەيىنگى ورىندا ماڭعىستاۋ (77,6 مىڭ) جانە قاراعاندى (64,5 مىڭ) وبلىستارى تۇر. ال ەڭ تومەنگى كورسەتكىشتەر ەكونوميكاسى ءالسىز ايماقتار – جەتىسۋ, جامبىل جانە الماتى وبلىستارىندا بايقالدى.
قاي سالانىڭ باسشىلارى ءوز قىزمەتكەرلەرىن ءجيى وقىتادى؟
وتكەن جىلى قايتا دايارلاۋ نەمەسە بىلىكتىلىكتى ارتتىرۋ كۋرستارىنان وتكەن ءار بەس قىزمەتكەردىڭ ۇشەۋى ونەركاسىپ كاسىپورىندارىندا جۇمىس ىستەگەن. ونەركاسىپ سالاسىنداعى مۇنداي قىزمەتكەرلەردىڭ جالپى سانى 379,1 مىڭ ادامدى قۇرادى. ولاردىڭ جارتىسىنا جۋىعى – 176,5 مىڭ ادام – مۇناي ءوندىرۋشى كومپانيالاردا, كەن ورىندارى مەن باسقا دا تاۋ-كەن كاسىپورىندارىندا جۇمىس ىستەگەن. ال 148 مىڭنان استام قىزمەتكەر قايتا دايارلاۋ مۇمكىندىگىن وڭدەۋ ونەركاسىبى كاسىپورىندارىندا العان.
وتكەن جىلى لوگيستيكا سالاسىندا دا بىلىكتىلىكتى ارتتىرۋ بەلسەندى ءجۇردى (60 مىڭ ادام), بۇل سالاعا تسيفرلاندىرۋ ايتارلىقتاي اسەر ەتتى. ال مەديتسينا سالاسىندا قىزمەتكەرلەردى وقىتۋداعى جوعارى كورسەتكىشتەردىڭ ارتىندا مەملەكەت تۇر. دەنساۋلىق ساقتاۋ مينيسترلىگى دارىگەرلەردىڭ كاسىبي ءوسۋى مەن بىلىكتىلىگىن ارتتىرۋىن قولدايدى. وتكەن جىلى جۇمىس بەرۋشى ەسەبىنەن قوسىمشا وقۋ 46,4 مىڭ دارىگەر مەن الەۋمەتتىك قىزمەتكەرلەرگە بەرىلدى. ال قىزمەت كورسەتۋ, ونەر جانە جىلجىمايتىن م ۇلىك سالالارىندا بىلىكتىلىگىن ارتتىراتىن قىزمەتكەرلەر سانى از بولعان.
باسشىلار ماماندى قايتا دايارلاۋعا قانشا قاراجات جۇمسايدى؟
ۇلتتىق ستاتيستيكا بيۋروسىنىڭ دەرەكتەرى بويىنشا, وتكەن جىلى كاسىپورىنداردىڭ ەسەبىنەن وقۋ ورىندارى كورسەتكەن قىزمەتتەردىڭ كولەمى 166,3 ملرد تەڭگەنى قۇرادى. ونىڭ تورتتەن ءبىرى, ياعني, 46,4 ملرد تەڭگە – جوعارى وقۋ ورىندارى مەن جوعارى وقۋ ورنىنان كەيىنگى ءبىلىم بەرەتىن ۇيىمدارعا كەتكەن.
2025 جىلدىڭ ءۇش توقسانىندا كاسىپورىندار ءبىلىم بەرۋ قىزمەتتەرى ءۇشىن 100,6 ملرد تەڭگە تولەگەن. ونىڭ 14,1 ملرد تەڭگەسى تەك جوعارى وقۋ ورىندارى مەن جوعارى وقۋ ورنىنان كەيىنگى ءبىلىم بەرەتىن ۇيىمدارعا كەتكەن. قالعانىنىڭ باسىم بولىگى, ياعني, 55,6 ملرد تەڭگە ء– ارتۇرلى ءبىلىم بەرۋ ۇيىمدارىندا وقىتۋعا جۇمسالعان.
