«ناۋرىز» باعدارلاماسىنا ءوتىنىم بەرۋ قاشانعا دەيىن جالعاسادى؟

رrodengi.kz مالىمەتىنشە, باعدارلاماعا قاتىسۋشىلاردىڭ 6 322-ءسى استانا, الماتى, شىمكەنت قالالارىندا تۇرادى. باعدارلاماعا وبلىس ورتالىقتارىنان 2 277 ازامات ەنگەن. ال اۋداندار مەن مونوكەنتتەردە تاعى 401 تۇرعىن بانك كليەنتى.

قاتىسۋشىلاردىڭ كوبى – 35 جاسقا دەيىنگىلەر (بارلىعى 5 379 ادام). بۇلاردىڭ باسىم بولىگى ۇيلەنگەن جانە بالالى جاستار.

سونداي-اق «ناۋرىز» باعدارلاماسىنىڭ قازىرگى تىزىمىندە 21,3 % قاتىسۋشىلار – اسكەري قىزمەتكەرلەر مەن ارنايى مەملەكەتتىك ورگانداردىڭ قىزمەتكەرلەرى.

«وسىعان بايلانىستى, بارلىعى 2026 جىلعى 13 قاڭتارعا دەيىن, ياعني وسى كۇنگە دەيىن «وتباسى بانككە» نەسيەگە ءوتىنىش بەرۋدى اياقتاۋى ءتيىس. ءوتىنىشتى بانك بولىمشەسىنە بارماي-اق, ونلاين تۇردە بەرۋگە بولادى», دەپ حابارلادى قارجىلىق ۇيىم.

ەگەر باعدارلاما قاتىسۋشىسى نەسيە العان بولسا, وندا وعان تۇرعىن ءۇي ىزدەپ, ساتىپ الۋ ءۇشىن 6 اي ۋاقىت بەرىلەدى.

قابىلدانعان وتىنىشتەردەن بەلگىلى بولعانداي, ەل تۇرعىندارى «ناۋرىزعا» الدىن-الا سانالى تۇردە دايىندالعان. ويتكەنى ەڭ كوپ بالل سىياقى ءۇشىن ەسەپتەلەدى.

«وتباسى بانك» وتانداستارىمىزدى قولجەتىمدى شارتتارمەن تۇرعىن ءۇي الۋعا قارجى جيناقتاۋعا ۇيرەتەتىندىكتەن, بالل ساناعاندا جيناقتاردىڭ مولشەرىنە ەرەكشە كوڭىل بولىنەدى. ەڭ ۇنەمشىل سالىمشىلار «ناۋرىز» باعدارلاماسىنا قاتىسۋشىلار تىزىمىنە ەنۋگە كوبىرەك مۇمكىندىك الادى.

بالل قالاي ەسەپتەلەدى:

- دەپوزيت بويىنشا سىياقىنىڭ مولشەرى – ءار 1 000 تەڭگە سىياقى ءۇشىن 1 بالل;

- تىركەلگەن نەكەسى بار ازاماتتارعا – 5 بالل;

- بالالى جاندارعا (بالالار سانىنا قاراماستان) – 10 بالل;

- الەۋمەتتىك وسال توپ ساناتىنداعىلارعا – 10 بالل;

- 35 جاسقا دەيىن (قوسا العاندا) – 5 بالل.

مىسالى, 1 000 بالل جيناۋ ءۇشىن «وتباسى بانكتەگى» دەپوزيت بويىنشا سىياقى كولەمى 1 ملن تەڭگەگە جەتۋى ءتيىس. 500 بالل – 500 مىڭ تەڭگە سىياقى ءۇشىن, 200 بالل – 200 مىڭ تەڭگە سىياقى ءۇشىن بەرىلەدى. ەڭ باستىسى – جيناقتاعى اقشا ەمەس, دەپوزيت بويىنشا الىنعان سىياقى. ونىڭ مولشەرى دەپوزيتتى تۇراقتى تولىقتىرۋ مەن سالىم مەرزىمىنە بايلانىستى. دەپوزيتتى ءاردايىم ءارى جۇيەلى تولىقتىرىپ, ونى ۇزاق ۋاقىت بويى ساقتاعان سايىن سىياقى مولشەرى ارتا بەرەدى. تەك شوتتا مول سوما بولعانى جەتكىلىكسىز, ەگەر ونىڭ دەپوزيتكە سالىنعان مەرزىمى از بولسا, بالل از بولىپ ەسەپتەلەدى. مىسالى, قاتىسۋشىلار تىزىمىندە ەڭ كوپ بالل جيناعاندار – 2011-2013 جىلدارى دەپوزيت اشىپ, ۇنەمى تولىقتىرىپ وتىرعان تۇرعىندار ەكەن. ياعني, «وتباسى بانكتە» دەپوزيتتى ەرتەرەك اشىپ, ونى ءجيى تولىقتىرعان سالىمشىلار جەڭىسكە تەزىرەك جەتەدى.

ماڭىزدى جايتتى ايتا كەتسەك, وتىنىشتەردى رەتكە قويۋ تەك باعدارلاماعا قاتىسۋعا ءوتىنىش بەرگەندەر اراسىندا جۇرگىزىلەدى. «وتباسى بانك» ەڭ جوعارعى نەمەسە ەڭ تومەن بالل دەگەن شەكتى ءوزى بەلگىلەي بەرمەيدى, بۇل مىندەت اۆتوماتتى جۇيەگە جۇكتەلگەن. جۇيە جيناعان بالل بويىنشا قاتىسۋشىلاردى جوعارىدان تومەنگە دەيىن سۇرىپتايدى. مىسالى, قازىرگى ۋاقىتتا ەڭ جوعارعى بالل – 1556,47; ال الدىڭعى ىرىكتەۋلەردە – 1 421,29 جانە 1 032,44 بولعان.

«وتباسى بانك»-ءتىڭ كەڭەستەرى

- وتباسىلىق پاكەت شەڭبەرىندە جيناقتاۋ. ياعني, تۇرعىن ءۇيدى ساتىپ الۋ ءۇشىن بۇكىل وتباسى بىرگە جيناقتايدى. ءار وتباسى مۇشەسى ءوز اتىنا دەپوزيت اشادى, جۇيەلى تۇردە تولىقتىرادى, ال ءوتىنىش بەرگەنگە دەيىن شوتتاردى ءبىر دەپوزيتكە بىرىكتىرۋگە بولادى.

- دەپوزيتتى ۇزبەي تولىقتىرىپ وتىرۋدىڭ ماڭىزى زور. ءبىر اي ىشىندە ءبىر رەت ەمەس, قارجىلىق مۇمكىندىگى بولسا, بىرنەشە رەت سالىم جاساۋ ۇسىنىلادى.

- زەينەتكە شىققاننان كەيىنگى ارتىق اقشانى دەپوزيتكە اۋدارۋ. ءوز زەينەتاقى شوتىنىڭ جاعدايىن مەزگىل-مەزگىل تەكسەرىپ وتىرۋ كەرەك. مۇمكىن, شوتتا مينيمالدى جەتكىلىكتى سومادان ارتىعىراق مولشەردەگى سوما بار شىعار, ەگەر بولسا, ونى دەپوزيتكە باعىتتاۋعا بولادى.

- سونداي-اق يپوتەكالىق نەسيە الۋ مۇمكىندىگى دە قاراستىرىلعان.