قازاقستان جازۋشىلار وداعى مەن زەينوللا سانىك اتىنداعى مادەنيەت قورىنىڭ ۇيىمداستىرۋىمەن وتەتىن «قازاق – قىتاي قالامگەرلەرى» حالىقارالىق ادەبي كونفەرەنتسياسىنا قاتىسۋ ءۇشىن وتاندىق دەلەگاتسيا قىتاي حالىق رەسپۋبليكاسىنىڭ استاناسى بەيجىڭ قالاسىنا باردى. ءىسساپاردىڭ العاشقى كۇنىندە قازاقستان جازۋشىلار وداعىنىڭ توراعاسى مەرەكە قۇلكەنوۆ الەم ادەبيەتىنىڭ ءىرى وكىلى, نوبەل سىيلىعىنىڭ يەگەرى, تانىمال جازۋشى جانە رومانيست مو يانمەن كەزدەسۋ وتكىزدى.
كەزدەسۋ بارىسىندا قوس قالامگەر بۇگىنگى الەم ادەبيەتىنىڭ دامۋ ۇردىستەرى, شىعارماشىلىق بايلانىستاردىڭ كەڭەيۋى جانە قازاق-قىتاي ادەبي قارىم-قاتىناسىنىڭ بولاشاعى تۋرالى كەلەلى اڭگىمە ءوربىتتى. اسىرەسە, زاماناۋي ادەبيەتتەگى جاڭا تاقىرىپتار, جازۋشىلاردىڭ الەۋمەتتىك جاۋاپكەرشىلىگى جانە ەكى ەل اراسىنداعى مادەني ىقپالداستىق ماسەلەلەرى تالقىلاندى.
مەرەكە قۇلكەنوۆ مو ياننىڭ الەمگە تانىلعان شىعارماشىلىق ەرەكشەلىگىن جوعارى باعالاپ, قالامگەردىڭ تۋىندىلارىن قازاق وقىرماندارى قىزىعا وقيتىنىن اتاپ ءوتتى. ءوز كەزەگىندە مو يان قازاق ادەبيەتىنىڭ باي مۇراسى مەن بۇگىنگى دامۋىنا قىزىعۋشىلىق ءبىلدىرىپ, قازاق جازۋشىلارىمەن بىرلەسكەن جوبالارعا نيەتتى ەكەنىن جەتكىزدى.
كەزدەسۋ اياسىندا ەكى ەل جازۋشىلارىنىڭ قاتىسۋىمەن بىرلەسكەن جوبالار جانە ادەبي الماسۋ باعدارلامالارىن جۇزەگە اسىرۋ جونىندە ۇسىنىستار قاراستىرىلدى. قالامگەرلەر الداعى ۋاقىتتا ادەبي بايلانىستاردى جاڭا دەڭگەيگە كوتەرۋ جونىندە ورتاق مۇددەنى قۋاتتادى.
بۇل كەزدەسۋ قازاقستان مەن قىتاي اراسىنداعى مادەني-گۋمانيتارلىق قاتىناستاردى نىعايتۋعا, ەكى حالىقتىڭ رۋحاني بايلانىسىن تەرەڭدەتۋگە باعىتتالعان ماڭىزدى قادامداردىڭ ءبىرى بولدى.
