فوتو: اشىق دەرەككوز
«بۇگىندە قازاقستاننىڭ مەديا كەڭىستىگىندە بىرنەشە سوت پروتسەسى وتۋىنە بايلانىستى تالقى ءجۇرىپ جاتىر. مادەنيەت جانە اقپارات مينيسترلىگى بۇل پروتسەستەردى, سونىڭ ىشىندە Orda.kz پەن قازتاگ-قا قاتىستى ىستەردى ەرەكشە نازاردا ۇستاپ وتىر. ءبىز ءۇشىن ەلىمىزدە ءسوز بوستاندىعىنىڭ ساقتالۋى مەن بارلىق اقپارات تاراتىپ وتىرعانداردىڭ زاڭ اياسىندا جۇمىس ىستەۋى اسا ماڭىزدى. كاسىبي جۋرناليستيكا ادالدىققا, وبەكتيۆتىلىككە جانە تەكسەرىلگەن اقپاراتتىڭ ناقتىلىعىنا نەگىزدەلۋى كەرەك», دەدى ايدا بالاەۆا.
ءمينيستردىڭ سوزىنشە, مەديا قاۋىمداستىق كاسىبي جۋرناليستەردىڭ قۇقىقتىق الاڭدا قورعالاتىنىن ءتۇسىنۋى ءتيىس.
«سەبەبى بۇل ءسوز بوستاندىعى مەن زاڭدى جۋرناليستىك قىزمەت سەكىلدى اسا ماڭىزدى ماسەلەلەرگە تىكەلەي قاتىستى. كاسىبي بۇقارالىق اقپارات قۇرالدارى زاڭدى بۇزباي جۇمىس ىستەگەن جاعدايدا عانا مەملەكەت ولاردىڭ قۇقىعىن ءتيىمدى قورعاي الاتىنىن ءتۇسىنۋى ءتيىس. ال ەگەر تاراپتار اراسىنداعى قاتىناستار قۇقىقتىق الاڭعا اۋىسسا, مەملەكەتتىك ورگاننىڭ ارالاسۋى سوتقا قىسىم رەتىندە قابىلدانۋى مۇمكىن. قالاي بولعاندا دا, ءبىز كاسىبي جۋرناليستەرگە قاتىستى اكىمشىلىك نەمەسە قىلمىستىق ىستەردىڭ بارىنشا اشىق ءارى وبەكتيۆتى قارالۋى قاجەت ەكەنىن ءاردايىم تالاپ ەتىپ كەلەمىز. جۋرناليستەرىمىزگە قاتىستى ىستەردى ءتيىستى ورگاندار زاڭ تالاپتارىن ساقتاي وتىرىپ, جان-جاقتى ءارى ءادىل قارايتىنىنا سەنىمدىمىن», دەپ اتاپ ءوتتى مينيستر.
سونىمەن قاتار ايدا بالاەۆا مينيسترلىك ءوز قۇزىرەتى شەگىندە جۋرناليستەردىڭ قۇقىقتارىن قورعاۋعا جانە سوت ىستەرىنىڭ ءادىل قارالۋىن قامتاماسىز ەتۋ ءۇشىن قاجەتتى بارلىق شارالاردى قابىلداۋعا دايىن ەكەنىن ايتتى.
بۇعان دەيىن Orda.kz جەتەكشىسى گۇلنار باجكەنوۆامەن قازتاگ-قا قاتىستى قىلمىستىق ءىس قوزعالعان ەدى. بۇدان بولەك, پوليتسيا دەپارتامەنتى ءتىنتۋ جۇرگىزىلگەنىن راستاپ, باجكەنوۆانىڭ ۇيىنەن, سونداي-اق Orda رەداكتسياسىنان قۇرىلعىلار تاركىلەنگەنىن حابارلادى. كەيىن تەرگەۋ سوتى گۇلنار باجكەنوۆانى 2 اي ءۇي قاماۋعا الۋ تۋرالى شەشىم شىعاردى.
