قىركۇيەك ايىندا وبلىستىق جاستار ساياساتى ماسەلەلەرى جونىندەگى باسقارما ىسكە قوسقان جوبا اۋىلداعى جاسوسپىرىمدەرگە تەك ءبىلىم ەمەس, سەنىم مەن مۇمكىندىكتىڭ جاڭا دەڭگەيىن ۇسىندى. ونلاين-داۋىس بەرۋ ارقىلى انىقتالعان 13 كاسىبي مەنتور 2000-نان استام جاسقا باعدار كورسەتىپ, 35 اۋىلدىق ەلدى مەكەندى ارالادى. مەديتسينا, اۋىل شارۋاشىلىعى, كاسىپكەرلىك, مەملەكەتتىك قىزمەت سىندى سالالاردىڭ ۇزدىكتەرى اۋىل بالاسىنىڭ ەسىگىن قاعىپ, ولاردىڭ ارمان-ماقساتىنا قۇلاق ءتۇردى. جوبا كوورديناتورى ءازيزا كۇلمەتتەنوۆا بۇل باستامانىڭ ءمانىن بىلايشا ءتۇسىندىردى:
– ءبىز اۋىلداعى جاستىڭ دا بيىككە ۇمتىلۋعا قۇقىعى بار ەكەنىن كورسەتكىمىز كەلدى. اقپارات تاپشىلىعى سەزىلەتىن ورتادا دۇرىس باعىت بەرۋ – جاس بۋىننىڭ تاعدىرىن ايقىندايتىن فاكتور, – دەيدى ول.
جوبانىڭ ەڭ جاس قاتىسۋشىسى – اقبەل اۋىلىنىڭ 13 جاستاعى بوزبالاسى ەراسىل ايبەك. بويىندا تۋعان جەرىنە دەگەن سۇيىسپەنشىلىك پەن ەڭبەكسۇيگىشتىك ەرەكشە بىلىنەتىن جاس تالاپ فەرمەر بولۋدى ارماندايدى.
– اۋىلدا قالىپ, شارۋاشىلىقتى دامىتقىم كەلەدى. بۇل جوبا ءبىزدى جىگەرلەندىردى, ءوز جولىمدى انىقتاۋىما كومەكتەستى, – دەيدى ول قۋانىشىمەن ءبولىسىپ.
ەراسىلدىڭ مەنتورى, شارۋا قوجالىعىنىڭ باسشىسى انار بوزاەۆا اۋىل شارۋاشىلىعىن تەك تابىس كوزى ەمەس, ۇلتتىڭ تىرەگى دەپ بىلەدى.
– ەراسىل – اۋىلدى شىن جۇرەگىمەن سۇيەتىن بالا. بولاشاقتا ءوز ءىسىنىڭ شەبەرى بولارىنا سەنىمدىمىن. جاستارعا تەك ءبىلىم ەمەس, جىگەر بەرۋ ماڭىزدى, – دەيدى تاجىريبەلى مامان.
جوبا اياسىندا دولينكا كەنتى اكىمىنىڭ ورىنباسارى جاسۇلان حاميتوۆ تا بىرنەشە جاسقا مەنتورلىق ەتتى. ول اۋىل وقۋشىلارىنىڭ بويىنان وزگەشە ۇمتىلىس بايقالعانىن ايتادى.
– ولاردىڭ كوزىندە بولاشاققا دەگەن سەنىم بار. بۇل – ەڭ ۇلكەن ناتيجە. اۋىلدان دا كوشباسشىلار شىعادى, تەك مۇمكىندىك قاجەت, – دەيدى ول.
جاسۇلان مىرزانىڭ شاكىرتى, 11-سىنىپ وقۋشىسى رۋسلان قۇلمۇحامەدوۆ جوبادان كەيىن ءوز جولىن تاپقانىن ماقتانىشپەن ايتادى.
– مەملەكەتتىك قىزمەتتىڭ قىر-سىرىن كورىپ, ءوزىمدى وسى سالادا ەلەستەتە باستادىم. ادامدارعا كومەكتەسكىم كەلەدى. بۇل – مەنىڭ تاڭداعان جولىم, – دەيدى بولاشاق مەملەكەتتىك قىزمەتكەر.
جوبا سوڭىندا مەنتورلار مەن شاكىرتتەردىڭ ەڭبەگى قورىتىندىلانعان ۇلكەن فەستيۆال ءوتتى. ساحنا تورىندە مەنتورلارعا «ۇلت ماقتانىشى», شاكىرتتەرگە «ۇلت ءۇمىتى» ماراپاتتارى تابىستالدى. بۇل – ولاردىڭ ەڭبەگىنە كورسەتىلگەن قۇرمەت قانا ەمەس, اۋىل جاستارىنا دەگەن قوعامنىڭ سەنىمى.
ءۇش اي ىشىندە ءاربىر جاس ءوز بولاشاق جولىن ايقىنداپ, مەنتورلارمەن بايلانىسىن بەكىتە ءتۇستى. ءار مەنتور شاكىرتتەرىن الداعى ۋاقىتتا دا قولدايتىنىن, بىرگە جاڭا جوبالارعا كىرىسەتىنىن جەتكىزدى.
«ۇلت قازىناسى» – اۋىلدىڭ تەك ءومىر ءسۇرۋ ورتاسى ەمەس, دامۋدىڭ دا ورتالىعى بولا الاتىنىن كورسەتكەن جوبا رەتىندە قۇندى. باستاما اۋىل جاستارىنىڭ وي-ءورىسىن كەڭەيتىپ, تۋعان جەرىندە قالسا دا ۇلكەن بيىككە جەتۋگە بولاتىنىن دالەلدەدى. جوبانىڭ اياقتالۋى – ءبىر كەزەڭنىڭ ءتۇيىنى عانا. الايدا اۋىلعا جەتكەن ءۇمىتتىڭ لەبى, جاستاردىڭ بويىندا ويانعان سەنىم وشپەك ەمەس. ويتكەنى ەلدىڭ ەرتەڭى – بۇگىن جول سالىپ جاتقان وسى جاس بۋىننىڭ قولىندا.
قاراعاندى وبلىسى
