بۇل – ەرەسەكتەرگە ارنالعان, فيلوسوفيالىق ءمانى تەرەڭ, ادام تابيعاتىنىڭ جۇمباق الەمىن اشاتىن تۋىندى. سپەكتاكل قوعامداعى رۋحاني جالعىزدىق پەن ادامدىق كەلبەتتى جوعالتۋ سىندى بۇگىنگىنىڭ وتكىر ماسەلەلەرىن قۋىرشاق ونەرىنىڭ كوركەم قۇرالدارى ارقىلى پايىمدايدى.
قويىلىم ادامنىڭ ىشكى الەمىنە تەرەڭ بويلايدى. باستى كەيىپكەردىڭ جانايقايى, ءوزىن تابۋعا دەگەن تالپىنىسى, قوعاممەن ۇندەسە الماي دال بولۋى – بارلىعى سيمۆولدىق بەينەلەر ارقىلى جەتكىزىلەدى. ساحناداعى ءار قۋىرشاق, ءار جارىق, ءار قوزعالىس – كەيىپكەردىڭ كوڭىل كۇيىنىڭ كورىنىسى.
ادامنىڭ ءوزى مەن كولەڭكەسى, سەنىمى مەن كۇدىگى, السىزدىگى مەن قۋاتى اراسىنداعى ماڭگىلىك تارتىس كورەرمەندى ءبىر مەزەت ويلانىپ, ءبىر مەزەت تولعانۋعا جەتەلەيدى. «مەن كىممىن؟» دەگەن ءبىر عانا سۇراقتىڭ ارتىندا ءار ادامنىڭ ءوز تاعدىرى, ءوز سۇرلەۋى, ءوز سىرلى الەمى جاتقانداي.
پرەمەرانىڭ رەجيسسەرى – گۇرجىستاننان ارنايى شاقىرىلعان, قۋىرشاق تەاترى ونەرىندە وزىندىك باعىت قالىپتاستىرعان نيكولوز ساباشۆيلي. ونىڭ ماقساتى – كۇردەلى يدەيالاردى كوركەمدىك شەشىممەن توعىستىرىپ, قۋىرشاق ارقىلى تەرەڭ پسيحولوگيالىق بەينەلەر تۋدىرۋ. بۇل جولى دا رەجيسسەر ادام جانىن قۋىرشاقتىڭ پلاستيكاسى, جارىق پەن كولەڭكەنىڭ قاقتىعىسى جانە تاعى دا باسقا ۇتقىر سيمۆولدىق دەتالدارمەن ورنەكتەپ, كورەرمەندى شىن مانىندە وي ساياحاتىنا جەتەلەيدى.
«مەن كىممىن؟» – بۇگىنگى قوعامداعى ەڭ وزەكتى سۇراقتاردىڭ ءبىرى. ءبىز وسى قويىلىم ارقىلى كورەرمەندى ءوز بولمىسىنا, ادامدىق مانگە قايتا ۇڭىلۋگە شاقىرامىز. قۋىرشاق تەاترى تەك بالالارعا ارنالعان دەپ ويلايتىندار قاتەلەسەدى. بۇل ونەر كۇردەلى يدەيالاردى دا نازىك, كوركەم ءارى تەرەڭ جەتكىزە الادى. پرەمەرا كورەرمەنگە ەرەكشە اسەر قالدىرادى دەپ سەنەمىز», دەيدى قۋىرشاق ونەرىندەگى تىڭ تاجىريبە تۋرالى تەاتر ديرەكتورى المات امانگەلدى.
ءيا, «مەن كىممىن؟» – جاي عانا سپەكتاكل ەمەس, قازىرگى قوعامعا قويىلعان كوركەم ساۋال. رۋحاني داعدارىسقا ۇشىراعان ادامزات بولمىسى, تۇلعالىق قۇندىلىقتىڭ السىرەۋى, ادام ىشىندەگى ءۇنسىز كۇرەس – ءبارى ساحنالىق تىلمەن شەبەر ءورىلىپ, جان تەبىرەنتەر كورىنىس رەتىندە الدىڭىزعا كەلەدى. كورەرمەن بۇل قويىلىمنان تەك ەستەتيكالىق اسەر عانا المايدى. ءار كورىنىس, ءار قيمىل, ءار ۇنسىزدىك – وزىڭىزگە قاراتا قويىلعان سۇراق سەكىلدى.
