بايقاۋ شىمىلدىعىن اقتوعاي جانە باياناۋىل ونەرپازدارى ءتۇردى. ونەر سايىسىن ۇيىمداستىرۋشى, «شاڭىراق» وبلىستىق ورتالىعىنىڭ ديرەكتورى زاميرا سولتانوۆا ونەرپازدارعا ساتتىلىك تىلەپ, جوبا ءوڭىر ونەرپازدارى اراسىنداعى شىعارماشىلىق بايلانىستى نىعايتاتىنىن اتاپ ءوتتى.
«ونەر دوداسى» بايقاۋى ءوڭىر-ءوڭىردى جارىستىرۋدى عانا ەمەس, تابىستىرۋدى كوزدەيدى. قازاق «ەل ءىشى – ونەر كەنىشى» دەگەن. سول كەنىشتى اقتارىپ, حالىق الدىنا ۇسىنساق, تالاپتى جانداردىڭ تالانتىن ۇشتاساق دەگەن نيەتتەن وسى ءبىر سايىس باستاۋ الدى» دەدى ول.
اقتىق كەزەڭگە شىققان ەكىباستۇز قالاسى مەن پاۆلودار اۋدانىنىڭ ونەرپازدارى 7 اينالىم بويى دەڭگەيلەرىنىڭ جوعارى ەكەنىن دالەلدەدى. قاتىسۋشىلار ءداستۇرلى ءان, تەرمە, كۇي, ايتىس, حالىقتىق انسامبل, سيرەك كەزدەسەتىن اسپاپ جانە حالىقتىق بي اتالىمدارى بويىنشا كىل مىقتىنى انىقتادى.
ونەر جارىسىنىڭ ناتيجەسى بويىنشا باس جۇلدەنى ەكىباستۇزدىق ونەرپازدار قانجىعالاپ, 2 ميلليون تەڭگەلىك سەرتيفيكاتپەن ماراپاتتالدى. ال پاۆلودار اۋدانىنىڭ نامىسىن قورعاعان ۇجىم ءبىرىنشى ورىندى يەلەندى. ەكىنشى ورىنعا تەرەڭكول اۋدانىنان كەلگەن ۇجىم يە بولسا, جۇلدەلى ءۇشىنشى ورىنعا ۋسپەن اۋدانىنىڭ ونەرپازدارى لايىقتى دەپ تانىلدى.
جەتى كەزەڭدەگى سايىسكەرلەردىڭ ونەرىنە جەرگىلىكتى مادەنيەت قايراتكەرلەرى, وڭىرگە تانىمال اقىندار مەن سازگەرلەر, ءانشى-كۇيشىلەر قازىلىق ەتىپ, باعا بەردى.
ەلدىڭ ابىرويىن اسقاقتاتاتىن سالا – ونەر. ال ونەر ادامىنا قولداۋ كورسەتۋ ءسىز بەن ءبىزدىڭ باستى مىندەتىمىز بولۋعا ءتيىس. ۇلتتىق ونەرگە قولداۋ كورسەتكەن اۋدان-قالا باسشىلارى بۇگىن سونىڭ جەمىسىن كوردى», دەپ اتاپ ءوتتى وڭىرلىك مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى مەدەت تاۋاسقان.
پاۆلودار وبلىسى
