زەينەت جاسىندا دەمەسەڭىز, ناعىز سالاماتتى ءومىر سالتىن بەرىك ۇستانعان اقساقال. اۋىلداستارى «تەرميناتور», «تەمىر ادام» دەپ اتاپ كەتكەن. قاجىمۇقاننىڭ ءىزىن قالاي جالعاستىرىپ كەلەدى دەيسىز عوي؟
68 جاستاعى الشىنباي اقساقال يوگانى ەركىن مەڭگەرگەن. ارماتۋرانى وڭاي مايىستىرىپ, 16 كيلولىق كىر تاسىن شىناشاق ساۋساعىمەن كوتەرەدى. سپورتپەن شۇعىلدانعانىنا 30 جىلداي ۋاقىت بولىپتى. بۇگىنگى تاڭدا قىر-سىرىن ابدەن تەرەڭ زەردەلەپ العان. ويتكەنى ءتۇرلى قاۋىپتى امالعا بارادى. العاشقىدا تاقتايدى سىندىرا باستاعان كەيىپكەرىمىز كەيىننەن قىزىل كىرپىشتى ءبىر ۇرىپ, ۇگىتۋگە كوشكەن. سونداي-اق ارماتۋرانى بىلەگىنە ءيىپ وڭاي ورايدى. ول از دەسەڭىز, شىنىمەن دە ءتۇرلى تريۋك ىستەيدى. ءتىپتى بىرنەشە ادام ازەر كوتەرەتىن اۋىر تاستى زەينەتكەر كەۋدەسى مەن ىشىنە قويىپ, ونى قاسىنداعىلارعا بالعامەن ۇرىپ, سىندىرتادى. ارينە, ونىڭ وزىندىك ءادىس-ايلاسى بار. اقساقالدىڭ ايتۋىنشا, مۇنىڭ قۇپياسى تىنىس الۋدى باقىلاۋدا ەكەن.
«سوققىنىڭ الدىندا دەنەنىڭ ءوزى تاس سياقتى قاتتى بولۋى كەرەك. مىسالى, بىردەڭەنى ۇرماس بۇرىن, ءسىز جۇدىرىعىڭىزدى قىساسىز. سول سياقتى كۇشتى بويعا جيناۋ كەرەك. بۇل دا تاجىريبەمەن كەلەدى», دەيدى.
اۋىل حالقىنىڭ اقساقالعا دەگەن قۇرمەتى ەرەكشە. ونەرىن ءتۇرلى مەرەكەلىك ءىس-شارالاردا, اسىرەسە ناۋرىز مەيرامىندا كورسەتەدى اۋىلداستارىنا. سپورتقا دەن قويماس بۇرىن كەۋدەسى مەن اياق-قولىندا قاتتى اۋىرسىنۋ بولىپتى. كۇندەلىكتى قالىپتى ۇيقىدان دا قالىپتى. سودان بۇل سىرقاتتىڭ الدىن الىپ, سالاماتتى ءومىر سالتىن ۇستانۋدى قولعا الادى.
ءبىر قىزىعى, الشىنباي مۇقىشەۆتى مۇنداي بالۋاندىققا ەشكىم جاتتىقتىرماعان. تەلەديداردان دا, ينتەرنەتتەن دە ۇيرەنبەگەن. وسىنداي قادامعا بارۋىنا باعىت بەرگەن – كۇش اتاسى قاجىمۇقاننىڭ كىتابى.
«تەڭدەسى جوق بالۋان قاجىمۇقان اتامىز سيىرعا دەيىن ەركىن كوتەرگەن. كەۋدەسىنە تاس سىندىرىپ, كولىك سۇيرەگەنىن دە جاقسى بىلەمىز. ناعىز كۇش اتاسى. سونىڭ اس-تويداعى حالىققا كورسەتكەن باتىرلىعىن, كۇشىن ەستىپ وستىك بالا كەزىمىزدەن. قىزىعۋشىلىعىم بار-تۇعىن. بىراق تولىق مويىن بۇرا الماي ءجۇردىم. كەيىننەن جاسىم قىرىققا جۋىقتاپ قالعاندا بويىمنان سىرقات سەزىلە باستادى. قول-اياعىم, كەۋدە تۇسىم سىزداپ, سىرقىراي باستادى. سودان مۇنان ايىعۋدىڭ بىردەن-ءبىر جولى شىنىعىپ, شىمىر بولۋ ەكەنىن ۇعىندىم. مىنە, سودان بەرى وتىز جىلعا جۋىقتادى. كۇندەلىكتى اس ىشەتىن سەكىلدى ءبىر مەزگىل قاجەتتىلىگىمە اينالىپ ۇلگەردى. اللاعا شۇكىر دەيمىن. ءوزىمدى سەرگەك ۇستاپ, جەڭىل سەزىنەمىن», دەيدى الشىنباي اقساقالدىڭ ءوزى.
– اكەم بالۋان شولاق, قاجىمۇقان, ءيمانجۇسىپ سەكىلدى بالۋاندار تۋرالى كوپ وقيدى. «سولاردىڭ كوزسىز باتىرلىقتارىن قايتالايمىن» دەيدى. ءبىر جاعىنان جاستارعا ۇلگى بولعىسى كەلەدى. ەلگە كوپ كورىنە بەرگەندى ۇناتپايدى, سۋرەتكە تۇسكىسى دە كەلمەيدى», دەيدى زەينەتكەردىڭ ۇلى شاكەن ءابجانوۆ.
ءيا, الشىنباي اقساقالدىڭ قالىبى بۇل. اسا قاتتى ەل كوزىنە جارقىراي تۇسكەندى جاقتىرا قويمايدى. سودان دا بولار, قاراعاندىدا كۇش يەسىنىڭ بارىن كەش ەستۋىمىز. قىسقاسى, اقجالدىق «تەرميناتورعا» تەمىردەي دەنساۋلىق تىلەيمىز.
قاراعاندى وبلىسى,
شەت اۋدانى,
اقجال كەنتى
