وسىندايدا «قازاق قايدا جۇرسە دە, قازاق» دەگەن اتالى ءسوزدى ايتپاسقا بولماس. ايگىلى ەپوس كەيىپكەرىنىڭ ەسىمىن يىسسۋعا اينالدىرعان مەنەدجەر نۇرجاندى اڭگىمەگە تارتتىق. اۋەلدە ءۇش جىل IT سالاسىمەن اينالىسقان. كەيىننەن پاريجگە قونىس اۋدارعان. ساۋدا باسقارۋ ماماندىعى بويىنشا ءبىلىم العان ول ءوز ارمانىن ورىنداۋ ءۇشىن فرانتسۋز ءتىلىن جەتىك مەڭگەرۋ قاجەت ەكەنىن ءتۇسىنىپتى. «قيىن ءىس جوق عالامدا, ىقىلاس قويعان ادامعا» دەمەكشى, كوپ وتپەي فرانتسۋز ءتىلىن جاقسى مەڭگەرىپتى. بۇل جەتىستىگى ونى اتاعى الاتاۋداي فرانتسۋز كومپانيالارىندا جۇمىس ىستەۋگە جەتەلەپتى.
بالا كەزدەگى ارمانىنا قول جەتكىزۋ ءۇشىن كوپ ىزدەنىپتى. تالاي جىلعى قۇلشىنىس پەن ءۇمىت, ەلگە دەگەن ماحاببات اقىرى «Kiz Jibek» برەندى بولىپ جۇزەگە اسىپتى. ونىڭ ايتۋىنشا, مۇنداي قادامعا بارۋعا «قىز جىبەك» جىرى اسەر ەتكەن. «Tolegen Paris» اتتى كومپانيا قۇرعان نۇرجان قازاق مادەنيەتىن شەتەلدىكتەرگە ناسيحاتتاۋعا ارنالعان بۇل ءونىمدى 2025 جىلدىڭ مامىر ايىندا شىعارعان. سىرتقى قورابى قازاقى ويۋىمەن ادىپتەلىپ, جۋسانمەن جۇپارلانعان ءيىسسۋ ماحاببات پەن ەركىندىكتى سەزىندىرىپ تۇرعانداي. جوبا اۆتورىنىڭ ايتۋىنشا, بۇل ونىمدە ءداستۇر مەن زاماناۋيلىقتى ۇيلەستىرە العان.
استاناعا ساپارى اياسىندا نۇرجاندى مادەنيەت جانە اقپارات ءمينيسترى ايدا بالاەۆا ارنايى قابىلدادى. بۇل كەزدەسۋ ۇلت مادەنيەتى مەن رۋحاني مۇراسىن وزگە جۇرتقا ناسيحاتتاپ جۇرگەن تالانتتى جاستى قولداۋ ەكەنى بەلگىلى. «نۇرجان تولەگەن ءوزى شىعارعان بۇل ءاتىردىڭ XVII عاسىرداعى قازاق دالاسىنىڭ «قىز جىبەك» ليريكالىق جىرىن قايتا جاڭعىرتقانىن ەرەكشە اتاپ ءوتتى. ونىڭ وسىدان بىرنەشە جىل بۇرىن قازاقستانعا جاساعان ساپارى ءومىرىن تۇبەگەيلى وزگەرتكەن ەكەن. سونىڭ اسەرىنەن پايدا بولعان بۇل برەند – شىعىس پەن باتىستى بايلانىستىراتىن جاڭا كوپىر ىسپەتتى. وسىنداي كرەاتيۆتى, باستاماشىل ءارى وتانشىل جاستاردى قولداۋعا شاقىرامىن. بۇل – ءبارىمىزدىڭ ورتاق مىندەتىمىز. سوندىقتان ونىڭ جۇمىسىنا ساتتىلىك پەن تولايىم تابىس تىلەيمىن!», دەدى مينيستر.
قازىر «Kiz Jibek» ءيىسسۋىنىڭ ۇلكەن قۇتىسى (100 مل) 235 ەۋرودان, ال كىشكەنە قۇتىسى (15 مل) 39 ەۋرودان ساتىلىمعا شىقتى. قالاي دەسەك تە, الىستا جۇرگەن نۇرجاننىڭ بۇل ءونىمى ۇلت مادەنيەتىن, تاريحىن جاڭا زاماندا وزگەشە قىرىمەن ءدۇيىم جۇرتقا تانىستىرا بەرمەك.
