تاەكۆوندوشىلار اراسىنداعى بيىلعى الەمدىك بىرىنشىلىك افريكانىڭ ءىنجۋ-مارجانى سانالاتىن نايروبيدە ۇيىمداستىرىلدى. بەيبارىس قابىلان 87 كەلىدەن جوعارى سالماق دارەجەسىندە سىنعا ءتۇستى. جارىستىڭ العاشقى كۇنىنەن-اق ونىڭ اياقالىسى ەرەكشە ەكەنى اڭعارىلدى. العاشقى اينالىمداردا ءۇندىستان مەن تۇركيا سپورتشىلارىن سەنىمدى تۇردە قاپى قالدىرىپ, جارتىلاي فينالعا جولداما الدى.
جارتىلاي فينالدا بەيبارىس يران سپورتشىسى اشرافي اميرموحاممادپەن بەلدەستى. تاەكۆوندو الەمىندە يران مەكتەبى ەرەكشە مىقتى سانالاتىنى بەلگىلى. سوعان قاراماستان, بەيبارىس قارسىلاسىنىڭ شابۋىلدارىن دەر كەزىندە توقتاتىپ, 2:1 ەسەبىمەن جەڭىسكە جەتىپ, فينالدىڭ ەسىگىن ايقارا اشتى.
«الەمدىك دەڭگەيدەگى جارىستا جەڭىسكە جەتۋ وڭاي ەمەس. يران سپورتشىسى مىقتى قارسىلاس بولدى, بىراق ءار راۋندتا تاكتيكالىق جوسپارىما ساي قيمىلداپ, جەڭىسكە جەتتىم. ەندى الداعى ماقسات – قازاقستاننىڭ كوك تۋىن الەمدىك ارەنالاردا بيىككە كوتەرۋ», دەيدى بەيبارىس قابىلان.
كەز كەلگەن دودانىڭ فينالىندا سپورتشىنىڭ ەڭ ۇلكەن ۇمتىلىسى سىنالادى. بۇل كەزەڭدە بەيبارىسقا وڭتۇستىك كورەيانىڭ وكىلى يان چجۋنيون قارسى تۇردى. تارتىستى جەكپە-جەكتە وتانداسىمىز قارسىلاسىنىڭ ءاربىر قيمىلىن ءدال باقىلاپ, ءسات سايىن ءتيىمدى سوققىلارمەن باسىمدىققا يە بولدى. يان چجۋنيون فينالدا بىرنەشە مارتە بەلسەندى ارەكەتتەرگە كوشكەنىمەن, بەيبارىستىڭ قىراعىلىعى مەن تەحنيكالىق ارتىقشىلىعى شەشۋشى ءرول اتقاردى. اقىرىندا, جارىس ناتيجەسى ءبىزدىڭ سپورتشىنىڭ ايقىن باسىمدىعىمەن اياقتالىپ, قازاقستاننىڭ اتى الەمدىك تاەكۆوندو تاريحىندا التىن ارىپپەن جازىلدى.
