كورمە قازاق جەرىمەن تاعدىرلارى توعىسقان الەم ادەبيەتىنىڭ ءۇش الىپ تۇلعاسى – الەكساندر پۋشكين, فەدور دوستوەۆسكي جانە ميحايل شولوحوۆتىڭ شىعارماشىلىق مۇراسى مەن تاريحي بايلانىستارىن جان-جاقتى تانىستىرادى. ەكسپوزيتسياعا XIX–XX عاسىرلاردان قالعان سيرەك قۇجاتتار, فوتوماتەريالدار, تۇرمىستىق زاتتار, قولجازبا كوشىرمەلەرى جانە ادەبي باسىلىمداردان تۇراتىن 101 جادىگەر قويىلدى.
تاعىلىمدى شارانىڭ سالتاناتتى اشىلۋى بارىسىندا الماتى مۋزەيىنىڭ ديرەكتورى كامشات باقتىعاليقىزى ۇسىنىلعان جادىگەرلەردىڭ قۇندىلىعىنا توقتالىپ: ««بۇل ەكسپوناتتار – تەك تاريحي دەرەك ەمەس, وتكەن مەن بۇگىندى جالعايتىن رۋحاني كوپىر. مۋزەيىمىز ءۇشىن مۇنداي اۋقىمدى كورمەنى قابىلداۋ – ۇلكەن مارتەبە. شارا مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ 2025 جىلعى 24 ساۋىردەگى XXXIV سەسسياسىندا بەرگەن تاپسىرمالارى اياسىندا, مادەنيەت جانە اقپارات مينيسترلىگىنىڭ باستاماسىمەن ىسكە اسىپ وتىر», دەپ اتاپ ءوتتى.
باتىس قازاقستان وبلىستىق تاريحي-ولكەتانۋ مۋزەيىنىڭ ديرەكتورى جانتاس نابيوللا ۇلى, پۋشكين مەن شولوحوۆتىڭ قازاق جەرىنەن العان اسەرى – بۇگىنگى ۇرپاققا ورتاق رۋحاني مۇرا ەكەنىن, بۇل كورمە – تىنىق دون مەن اق جايىق اراسىنداعى تاريحي بايلانىستارعا تاعزىم رەتىندە جۇزەگە اسقانىن جەتكىزدى.
«حالىقتار اراسىنداعى دوستىق پەن مادەني ساباقتاستىقتى نىعايتۋ – ءبىزدىڭ مۋزەيدىڭ باستى مىندەتتەرىنىڭ ءبىرى. ءبىز ۇلى تۇلعالاردىڭ شىعارماشىلىق مۇراسىن ەلگە كەڭىنەن تانىتۋ ارقىلى رۋحاني كوپىردى نىعايتا تۇسەمىز», – دەيدى ول.
ءوز كەزەگىندە ف.دوستوەۆسكيدىڭ ادەبي-مەموريالدىق مۋزەيىنىڭ ديرەكتورى يرينا سولوۆيوۆا, قالامگەردىڭ سەمەي كەزەڭى قازاق رۋحانياتىمەن تەرەڭ بايلانىستى ەكەنىن, كورمە سول تاريحي كەزەڭدى جاڭا قىرىنان كورسەتۋگە مۇمكىندىك بەرەتىنىنە توقتالدى.
اقىن, حالىقارالىق «الاش» سىيلىعىنىڭ لاۋرەاتى ادىلعازى قايىربەكوۆ ادەبي بايلانىس تۋرالى ويىمەن ءبولىسىپ, قازاق ادەبيەتى ورىس كلاسسيكتەرىنىڭ ۇزدىك تۋىندىلارىن اۋدارۋ ارقىلى الەمدىك رۋحانياتپەن تەرەڭ ۇندەسكەنىن, بۇل ىقپالداستىق – ەكى حالىقتىڭ مادەني قازىناسىن بايىتا تۇسكەنىن ايتتى.
كورمەدە پۋشكيننىڭ 1833 جىلعى ورال ساپارىنا قاتىستى ماتەريالدار, دوستوەۆسكيدىڭ سەمەيدەگى ءومىرىن بەينەلەيتىن جادىگەرلەر, شولوحوۆتىڭ قازاقستانمەن بايلانىسىن ايعاقتايتىن كىتاپتار, فوتوسۋرەتتەر مەن جەكە زاتتار كەڭىنەن ۇسىنىلدى.
الماتى
