جان ادامباەۆ 2009 جىلدىڭ 18 قاڭتارىندا شىمكەنت قالاسىندا دۇنيەگە كەلگەن. بۇگىندە دوستىق مەكتەبىنىڭ 11-سىنىپ وقۋشىسى. بىراق ول جاي عانا قاتارداعى وقۋشى ەمەس, ينجەنەرياعا قاراي سانالى تۇردە بەت الىپ كەلە جاتقان جاس تالاپكەر. ونىڭ بولمىسىنداعى تەحنيكالىق قىزىعۋشىلىق ەرتەدەن بايقالىپتى.
اناسىنىڭ ايتۋىنشا, جان ەكى جاسىنان باستاپ پلاستيلين مەن لەگونى قولىنان تاستاماعان. باسقا بالالار ءتارىزدى ويىنشىق كولىكتەردى جارىستىرىپ, دوپ قۋىپ كەتپەي, ساعاتتاپ ۇستەل باسىندا وتىرادى ەكەن. پلاستيليننەن جانۋارلار, ۇيلەر, راكەتاعا ۇقساس پىشىندەر جاسايتىن. دايىن لەگو جيىنتىقتارى بەرىلگەندە, ول نۇسقاۋلىققا قاراماي, ويىنداعى قۇرىلىمدى ءوز بەتىنشە قۇراستىرىپ شىعاتىن.
«مەن بىردەڭەنى ءدال سولاي قايتالاۋدان شارشايمىن. مەنى قىزىقتىراتىنى - باسقاشا جاساۋ, وزگەشە قۇراستىرۋ», دەيدى قازىر جان ك ۇلىپ.
جەڭگەسى ونىڭ وسى ەرەكشە قاسيەتىن بايقاپ, YouTube ارناسىن اشىپ بەرەدى. ۆيدەوعا ءتۇسىرىپ وتىرعان - جاننىڭ ءوزى. قۇراستىرعان دۇنيەسىن كامەراعا قاراتىپ, نەگە بۇلاي جاساعانىن, قالاي جۇمىس ىستەيتىنىن ۇلكەن ءبىر ينجەنەر سەكىلدى تۇسىندىرەدى. بالا بولسا دا, سوزدەرى انىق, سەنىمدى, كوزقاراسى نىق.
ۋاقىت وتە كەلە بالالىق قىزىعۋشىلىعى ناقتى باعىتقا اينالا باستايدى. جان ادامباەۆ روبوتوتەحنيكا كۋرستارىنا قاتىسىپ, مەحانيزمدەر قۇراستىرۋدى ۇيرەنەدى. العاشقى روبوتىن جاساعان كۇنىن ول ءالى ۇمىتقان ەمەس.
«تەتىكتى قوسقان كەزدە روبوت قوزعالدى. مەنى تىڭداعانداي بولدى. سول ساتتە مەن مۇنىمەن جاقسىلاپ اينالىساتىن بولامىن” دەگەن وي كەلدى», دەيدى جاس ينجەنەر.
جان ءۇشىن ينجەنەريا تەك جۇمىس ەمەس. بۇل بالا كۇنىنەن كەلە جاتقان تابيعي جالعاستىق, ءوزىنىڭ ىشكى الەمىن تۇسىندىرەتىن ءتىل. ول بولاشاقتا شەتەلدە ءبىلىم الىپ, ينجەنەريا سالاسىندا وزىق تاجىريبەنى مەڭگەرۋدى ارماندايدى.
«الەمنىڭ قالاي جۇمىس ىستەيتىنىن تۇسىنگىم كەلەدى. ونى جاقسارتۋعا ءوز ۇلەسىمدى قوسسام دەيمىن», دەيدى جاس جىگىت.
اناسىنىڭ دا سوزىندە ەرەكشە سەنىم بار.
ء«ار بالانىڭ تابيعي پوتەنتسيالى ەرتە كورىنەدى. جان ويىنشىق كولىكتى ەمەس, لەگونى تاڭدادى. الاڭدا ەمەس, ۇستەل باسىندا ساعاتتاپ وتىرا بەرەتىن. روبوت قۇراستىرعان كەزدە جۇزىندەگى قۋانىشتى كورگەندە, ونىڭ جولى وسى ەكەنىن ءتۇسىندىم», دەيدى ول.
جان ءوزىنىڭ بالالىق قىزىعۋشىلىعىن بۇگىندە ناقتى ماقساتى بار جولعا اينالدىرا ءبىلدى. ينجەنەرلىك ويلاۋى, تاباندىلىعى, جاڭا نارسە ويلاپ تابۋعا دەگەن ىنتاسى ونى شىنىمەن دە بولاشاق مامان رەتىندە ايشىقتاپ تۇر. ونىڭ قولىنان شىققان كىشكەنتاي لەگو بۇيىمدارى بولاشاقتا ۇلكەن جوبالارعا اينالۋى ابدەن مۇمكىن.
